काठमाडौँ । महोत्तरीको औरही नगरपालिकास्थित प्रसाद माध्यमिक विद्यालययमा अध्यन गर्दै आएकी एक छात्रा शिक्षकको कुटाइबाट घाइते भएकी छन् ।
कक्षा ६ मा पढ्ने आरतीकुमारी महरालाई गृहकार्य नगरेको भन्दै शिक्षकले निर्ममतापूर्वक कुटेर घाइते बनाएको खुलेको हो । छात्राको अहिले अस्पतालमा उपचार भइरहेको छ ।
कक्षा ६ विज्ञान विषयका शिक्षक दिपेश यादवले गृहकार्य नगरेको भन्दै उनीमाथि निर्घात कुटेको गरेको परिवारको आरोप छ । बलिकाको शरीरभरि लठ्ठीको सुम्ला छ ।
विद्यालयले पनि शिक्षक यादवले कुटेको स्वीकार गरेको छ । कुटाइपछि हल्ला भएपछि अभिभावक राखेर घटना गुपचुप बनाउन खोजेको अभिभावकको गुनासो छ ।
‘विद्यालयका प्रधानाध्यापक शिवशरण यादवले हामीलाई बोलाएर उपचार खर्च भन्दै पैसा दिन खोजे, तर हामीले मानेनौँ,’ बलिकाका बुबा साजेन्द्र महराले भने, ‘हामी शिक्षकलाई कडा कारबाही होस् भन्ने चाहान्छौँ ।’
प्रधानाध्यापक शिवशरण यादवले घटनामाथि छानबिन गरी कारवाही प्रक्रिया अगाडि बढाउने पीडित पक्षलाई आश्वासन दिएका छन् ।