काठमाडौँ । चालु आर्थिक वर्ष २०७९–८० को पहिलो महिनामा नेपालले विश्वका विभिन्न देशबाट कूल एक खर्ब ३१ अर्ब २८ करोड ६० लाख बराबरको वस्तु आयात गरेको छ । यसबाट सरकारले ३१ अर्ब ९६ करोड १६ लाख रुपैयाँ राजस्व संकलन गरेको छ ।
मूल्यका आधारमा सबैभन्दा बढी डिजेल भित्रिएको छ । सो अवधिमा नेपालले आठ अर्ब ९८ करोड ९ लाख रुपैयाँको डिजेल आयात गरेको छ । डिजेलपछि ठूलो मूल्यमा नेपालले पेट्रोल आयात गरेको छ । साउनमा नेपालले ६ अर्ब ३८ करोड ६० लाख रुपैयाँको पेट्रोल आयात गरेको छ ।
नेपालले साउन महिनामा मात्र ६ अर्ब १८ लाख ९९ हजार रुपैयाँको कच्चा भटमास तेल आयात गरेको छ । सो अवधिमा ५ अर्ब २७ करोड ८० लाख रुपैयाँको एलपी ग्यास नेपाल भित्रिएको छ ।
विभागका अनुसार साउनमा ४ अर्ब १६ करोड ३६ लाख ६८ हजार रुपैयाँको कच्चा पाम तेल, ३ अर्ब ६६ करोड १ लाख ६६ हजार रुपैयाँको स्टिल, ३ अर्ब २४ करोड १३ लाख ६७ हजार रुपैयाँको फलाम र २ अर्ब ७९ करोड ३८ लाख ७९ हजार रुपैयाँको खोप नेपालले आयात गरेको छ ।
उक्त अवधिमा २ अर्ब ५७ करोड ४३ लाख ५७ हजार रुपैयाँको मोबाइल फोन र २ अर्ब ७ करोड ३७ लाख १३ हजार रुपैयाँको युरिया नेपालले आयात गरेको विभागले जनाएको छ ।