बैतडी । कोरोना भाइरस (कोभिढ–१९) संक्रमण फैलिएको तीन वर्षपछि जिल्लामा पहिलोपटक कोरोना कोष स्थापना गरिने भएको छ । कोरोना जोखिम नियन्त्रणका लागि जिल्लामा पाँच लाख बराबरको कोष स्थापना हुने भएको हो ।
प्रमुख जिल्ला अधिकारी सुरेश पन्थीका अनुसार जिल्लाका प्रत्येक स्थानीय तहबाट ५० हजारका दरले जम्मा गरी पाँच लाख बराबरको कोष स्थापना हुने भएको हो । यहाँ १० स्थानीय तह छन् । केही दिनअगाडि विपद् व्यवस्थापन समितिको बैठकले कोरोना कोष स्थापना गर्ने निर्णय गरेको हो ।
कोरोना सङ्क्रमितलाई उपचारको दायरमा ल्याउन र उनीलाई सम्बन्धित ठाउँसम्म पुर्याउन सहयोग गर्ने उद्देश्यले कोरोना कोष स्थापना गर्ने निर्णय भएको उनले बताए । सङ्क्रमणको चौथो लहरको जोखिम बढिरहेकालाई पूर्व तयारी गर्न थालिएको हो ।
उनले भने, ‘सीमा नाकामा कोरोना परीक्षण गर्दा पोजेटिभ देखिएकालाई होल्डिङ सेन्टरमा राख्दा र उनीलाई सम्बन्धित ठाउँमा पुर्याउन लाग्ने पैसा कोषबाट खर्च गरिने छ ।’ कोरोना कोष स्थापना गरेर त्यसको व्यवस्थापन गर्ने जिम्मा स्वास्थ्य कार्यालयलाई दिइएको छ ।
विपद् व्यवस्थापन समितिको बैठकले प्रत्येक स्थानीय तहमा होल्डिङ सेन्टर र आइसोलेसन, क्वारेन्टिन निर्माण गरिने, कोरोनाविरुद्धको खोप लगाउन छुटेका नागरिकलाई खोपको दायरमा ल्याउने, जिल्लामा सञ्चालनमा रहेका एम्बुलेन्सको लगत यथाशीघ्र जिल्ला एम्बुलेन्स व्यवस्थापन समितिको सचिवालयमा पेस गर्ने निर्णय गरेको छ ।
यसैगरी प्रत्येक स्थानीय तहमा स्थानीय आपत्कालीन कार्य सञ्चालन केन्द्र स्थापना गर्ने निर्णय भएको छ । त्यसका लागि जिल्ला आपत्कालीन कार्यसञ्चालन केन्द्र र नेपाल रेडक्रस सोसाइटीसँग समन्वय गरेर अघि बढ्नेसमेत निर्णय भएको छ ।
भारतसँग सीमा जोडिएको बैतडीमा हालसम्म तीन हजार ३६९ जनामा कोरोना सङ्क्रमण पुष्टि भइसकेको छ । कोरोनाका कारण यहाँ १९ जनाले ज्यानसमेत गुमाइसकेका छन् ।