काठमाडौं- माओवादी केन्द्रका अध्यक्ष पुष्पकमल दाहाल ‘प्रचण्ड’ वाकपटु नेताका रूपमा चिनिन्छन्। त्यही वाकपटु प्रवृत्तिका कारण उनी पटक–पटक विवादमा परेका छन्। त्यस्तै वाकपटु शैली देखाए जापान भ्रमणको पहिलो दिन शनिबार।

नेपाल भ्रमणमा आउँदै नआएका जापानका पूर्वप्रधानमन्त्री सिन्जो आबेलाई काठमाडौंमै २-३ पटक भेटेको दाबी गरेर प्रचण्ड हँसीमजाकका पात्र बनेका छन्। पाँच दिने जापान भ्रमणका क्रममा शनिबार बिहान उनी टोकियो उत्रिए। स्थानीय नारिता अन्तर्राष्ट्रिय विमानस्थलमा उत्रिएलगत्तै उनले पत्रकारहरूसँग कुराकानी गर्दै हालै हत्या गरिएका आबेसँग काठमाडौंमा २-३ पटक भेटेको दाबी गर्न भ्याए। र, यसपटक भेट्न नपाएकामा पछुतो भएको बताए।

स्वर्गीय आबेसँग आफ्नो राम्रो सम्बन्ध भएको दाबी पनि प्रचण्डले गरे। ‘म जापान आउने तय भएसँगै पूर्वप्रधानमन्त्री सिन्जो आबेसँग भेट्नका लागि समय मिलाउन खोजेको थिएँ। जापानका राजदूतसँग पनि कुरा भएको थियो। उहाँ पूर्वप्रधानमन्त्रीका रूपमा नेपाल भ्रमण गर्दा मसँग २÷३ पटक कुराकानी भएको थियो। र, असाध्यै राम्रो सम्बन्ध भएको थियो हाम्रो,’ दाहालको दाबी थियो, ‘एक अर्काप्रति राम्रो संवाद भएको थियो। उहाँलाई भेटेर नेपाल र जापानको सम्बन्धलाई एउटा अर्को हाइटमा कसरी लैजाने भन्ने कुरा गर्ने इच्छा थियो। त्योचाहिँ पूरा भएन। बडो दुर्भाग्यपूर्ण घटना भयो। जापानको लागि त यो विरलै हुने घटना हो। यसको विश्वव्यापी पनि प्रभाव परेको छ। म उहाँप्रति विशेष सम्मान भन्न चाहन्छु।’

प्रचण्डले जापानी पूर्वप्रधानमन्त्रीका रूपमा आबेले नेपाल भ्रमण गरेको दाबी गरेका छन्। जानकारहरूका अनुसार उनले नेपाल भ्रमण गरेकै थिएनन्।