कोलम्बो- श्रीलंकामा सरकारविरोधी प्रदर्शनकारीहरू राष्ट्रपति गोटाबाया राजापाक्षेको सरकारी निवासमै प्रवेश गरेका छन्।
प्रदर्शनकारी प्रवेश गरेपछि राष्ट्रपति राजापाक्षे सुरक्षित स्थानमा गएका छन्। उनी कहाँ गए भन्ने जानकारी सरकारी अधिकारीहरूले दिएका छैनन्। बढ्दो महँगी र दैनिक उपभोग्य सामानको अभावका कारण सरकार विरोधी प्रदर्शन तीव्र बनेको छ।
प्रदर्शनकारीलाई तितरबितर पार्न प्रहरीले अश्रु ग्यास, पानीको फोहोरा र हवाई फायर गरेको छ। तर, प्रहरीको दमन छिचोल्दै प्रदर्शनकारी राष्ट्रपति निवासमै घुसेका हुन्। उनीहरूले राष्ट्रपति राजापाक्षेको राजीनामा माग गरिरहेका छन्। देशका विभिन्न भागबाट प्रदर्शनकारी राजधानी कोलम्बो पुगेका छन्।
राजधानी कोलम्बोमा लगाइएको कर्फ्यु पनि प्रदर्शनकारीले अवज्ञा गरेका छन्। राष्ट्रपति निवासमा प्रवेश गर्दै गरेका धेरै प्रदर्शनकारी घाइते भएका छन्।
श्रीलंकामा अनियन्त्रित रूपमा बढेको महँगीका कारण दैनिक उपभोग्य सामान, इन्धन र औषधि खरिद गर्नै नसकिने अवस्था छ।
विरोध प्रदर्शन नियन्त्रणका लागि हजारौं संख्यामा प्रहरी, अर्धसैनिक बल र सेना परिचालन गरिएको छ। प्रदर्शनकारीले अहिलेको अवस्था आउनुमा राष्ट्रपति राजापाक्षे जिम्मेवार रहेको आरोप लगाएका छन्।