टोकियो- शुक्रबार गोली प्रहार गरिएका जापानका पूर्वप्रधानमन्त्री सिन्जो आबेको उपचार क्रममा निधन भएको छ।
जापानी सञ्चार माध्यमहरूले उनको निधन भएको पुष्टि गरेका छन्। शुक्रबार राजधानी टोकियो नजिकको शहर नारामा एक चुनावी कार्यक्रमलाई सम्बोधन गरिरहेका आबेमाथि एक युवकले गोली प्रहार गरेका थिए।
जापानी प्रधानमन्त्री फुमियो किसिदाले आबेमाथिको आक्रमणलाई घृणित कार्य संज्ञा दिएका छन्। उनीमािथ गोली प्रहार गर्नुको उद्देश्य खुलेको छैन। तर, त्यसमा चुनावी अभियान जोडिएको अनुमान गरिएको छ। आक्रमणकारीलाई प्रहरीले नियन्त्रणमा लिएको छ।
आबेमाथि पछाडिबाट गोली प्रहार गरिएको थियो। जापानमा हाते बन्दुक प्रतिबन्धित छन्। त्यसका बावजुद पेस्तोलबाट गोली प्रहारका घटनालाई दुर्लभ मानिने गरेको छ।
उनीमाथि गोली प्रहार गर्ने व्यक्ति तेत्सुया यामागामी नामक युवक हुन्। उनी नारा शहरकै बासिन्दा हुन्।
स्वर्गीय आबे २६ डिसेम्बर २०१२ देखि १६ सेप्टेम्बर २०२० सम्म आठ वर्ष जापानका प्रधानमन्त्री थिए। उनको दल लिबरल डेमोक्रेटिक पार्टी जापानमा प्रभावशाली राजनीतिक शक्ति हो।