काठमाडौं– रुसमाथि थप प्रतिबन्ध लगाउने उद्देश्यले विश्वका धेरै देश युरोपमा जम्मा भएका छन् भने अर्कोतर्फ रुसले आइतबार युक्रेनको राजधानी कीभमा पुनः मिसाइल प्रहार गरेको छ ।
यसअघि शनिबार युक्रेनको पूर्वी शहर स्वेइरो डोनेस्क रुसी सेनाको कब्जामा गएपछि युक्रेनलाई ठूलो धक्का लागेको छ।
समाचार एजेन्सी रोयटर्सका अनुसार सेन्ट्रल कीभमा बिहान चारवटा विस्फोट भएको थियो। त्यसपछि कीभको दक्षिणी क्षेत्रमा थप दुईवटा विस्फोटको आवाज सुनिएको थियो ।
राष्ट्रपति कार्यलयका प्रमुख आन्द्रे एर्माकले भने, ‘रूसले फेरि एक पटक कीभमा आक्रमण गरेको छ। मिसाइलहरूले एउटा अपार्टमेन्ट र साना बालबालिकाहरुको एउटा विद्यालय ध्वस्त पारेको छ ।’
युक्रेनी प्रहरी प्रमुख इहोर क्लिमेन्कोले उक्त आक्रमणमा परी पाँच जना घाइते भएको बताएका छन् ।
रुसले २४–२५ फेब्रुअरीबीच युक्रेनमाथी आक्रमण गरेको थियो। यसरी दुई देशबीच युद्ध शुरु भएको चार महिना पूरा भएको छ ।