चितवन । गृहमन्त्री बालकृष्ण खाँणले सशस्त्र प्रहरी बल नेपाल विपद् व्यवस्थापन तालिम शिक्षालय कुरिन्टारमा संचालित सिसं २ गोताखोर तालिमको जेठ २८ गते एक समारोहका बीच समापन गरेका छन् ।
सोही अवसरमा गृहमन्त्री खाँणले उक्त तालिमका सर्वोत्कृष्ट प्रशिक्षार्थी सशस्त्र प्रहरी जवान शिव कोलीलाई पुरस्कार प्रदान गरो थिए । उनले तालिम सफलतापूर्वक सम्पन्न गरी कार्य क्षेत्रमा खटिई जान लागेका गोताखोरलाई हार्दिक बधाई दिँदै सशस्त्र प्रहरीले पानीजन्य विपद् उद्वारमा तयार गरेको जनशक्ति तथा अन्य विपद् उद्वार कार्य प्रशंसनीय रहेको बताए ।
उनले विपद् व्यवस्थापनका लागि आवश्यक श्रोतसाधन, तालिम र सेवा सुविधा बढाउन गृहमन्त्रालय सकारात्मक रहेको चर्चा गर्दै विपद्को समयमा पूर्व तयारी र विपद्पछि खोजी र उद्वारका लागि सशस्त्र प्रहरीलाई सदैव तयारी हालतमा रहन निर्देशन दिए ।
समारोहमा गृहमन्त्री खाँणले सशस्त्र प्रहरी महानिरीक्षक राजु अर्याललाई राष्ट्रिय विपद् जोखिम न्यूनिकरण तथा व्यवस्थापन प्राधिकरणको तर्फबाट उपलब्ध गराइएको ९७ लाख रुपैयाँ बराबरको विभिन्न विपद् उद्वार सामाग्रीसमेत हस्तान्तरण गरेका थ्एि ।
सोही समारोहमा गृहसचिव टेकनारायण पाण्डेले विपदमा परेका आम नागरिकको जीउ धनको सुरक्षा गर्नु सबैको कर्तव्य रहेको चर्चा गर्दै विपद् तथा महामारी आउनुभन्दा पहिले तयारी भएर बस्न सकिएमा कार्यक्षेत्रमा सदैव सफलता मिल्ने बताए ।
उनले यस्ता तालिम आफैमा जोखिमयुक्त र चुनौतीपूर्ण रहेको बताउँदै विपद् व्यवस्थापन तथा जोखिमयुक्त उद्वार कार्यमा खटिने सुरक्षाकर्मीलाई खटिएको समयमा दैनिक भत्ताको व्यवस्था भएमा उद्वारमा परिचालन हुने सुरक्षाकर्मीको मनोबल उच्च हुने उल्लेख गरे ।
सशस्त्र प्रहरी बल नेपाल विपद् व्यवस्थापन तालिम शिक्षालय कुरिन्टारका समादेशक कामु सशस्त्र प्रहरी वरिष्ठ उपरीक्षक अन्जनी कुमार पोखरेलले स्वागत मन्तव्यको क्रममा गोताखोर जस्तो महत्वपूर्ण तालिम संचालन गर्न पाउँदा यसलाई एउटा अवसरको रुपमा लिएको बताए । उनले आगामी दिनमा समेत यस खालका तालिम निरन्तर चलिरहने विश्वास व्यक्त गरे ।
पाँच हप्ता अवधिको उक्त तालिम २० जना सशस्त्र प्रहरी कर्मचारीहरुले सफलतापूर्वक सम्पन्न गरेका छन् । तालिमको दौरानमा प्रशिक्षार्थीलाई सशस्त्र प्रहरी बल नेपाल नम्बर १ बराह बाहिनी मुख्यालय सुनसरीस्थित सप्तकोशी नदी, पोखराको फेवाताल र मकवानपुरको ईन्द्र सरोवरमा समेत तालिमको अभ्यास गराइएको थियो ।