काठमाडौं- भारतीय चर्चित अभिनेता सलमान खानलाई धम्कीपूर्ण पत्र प्राप्त भएको मामलामा नयाँ खुलासा भएको छ।
प्रहरी सोधपुछका क्रममा सौरभ महाकालले सलमानलाई ग्याङ्स्टर लरेन्स विश्नोईले धम्की दिएको खुलासा गरेका छन्। महाकाल लरेन्सको नजिक छन्। लरेन्सले हत्याको धम्की दिएर मात्रै होइन, सलमानलाई मार्न सम्पत नेहरा नामक सुटर पनि पठाएको कुरा सार्वजनिक भएको छ।
भारतीय सञ्चार माध्यमका अनुसार सन् २०२१ मा लरेन्सले सलमानको हत्या गर्न सम्पत नेहरालाई ‘हायर’ गरेका थिए। योजनाअनुसार उनी मुम्बई पनि पुगेका थिए। मौका पर्खेर सम्पतले सलमानलाई गोली हान्ने योजना बनाएका थिए। तर, उनीसँग रहेको पेस्तोलले टाढासम्म प्रहार गर्न सकेन।
सलमानलाई सधैं अंगरक्षकहरूले घेरेका हुन्थे। त्यसैले योजना विफल हुने देखेपछि विश्नोईको आदेशमा आक्रमण रद्द गरिएको थियो।
सम्पतले दोस्रोपटक पनि आक्रमण गर्ने योजना बनाए। यसपटक उनले आफ्नो गाउँका दिनेश फौजीबाट आरके स्प्रिङ राइफल खरिद गरेका थिए। विश्नोईले उक्त राइफल आफ्ना चिनजानका अनिल पाण्डेबाट करिब चार लाख भारुमा किनेका थिए। तर, दिनेशसँग राइफल हुँदा प्रहरीले पक्राउ गरेको थियो। त्यसपछि सम्पत नेहरा पनि पक्राउ परेका थिए। यसबाहेक लरेन्सले चलचित्र ‘रेडी’को सुटिङका क्रममा पनि खानमाथि हमला गर्ने योजना बनाएका थिए तर सफल हुन सकेनन्।
सम्पत नेहरा ग्याङ्स्टर लरेन्स बिश्नोईको दाहिने हात हुन्। उनी चण्डीगढ प्रहरीका सेवानिवृत्त सहायक निरीक्षक रामचन्दरका छोरा हुन्। यसका साथै सम्पत राष्ट्रिय स्तरको डेकाथलन (हर्डल रेस) रजत पदक विजेता पनि हुन्।
सम्पत पढाइकै क्रममा ग्याङ्स्टर लरेन्स विश्नोईको सम्पर्कमा आएका थिए। उनले लरेन्सलाई हरेक अपराधमा साथ दिए र विस्तारै गुन्डाको दाहिने हात बने। सम्पत लरेन्स गिरोहका सार्प सुटर पनि हुन्।