कैलाली । कैलालीको गोदावरी नगरपालिका–५ स्थित मत्स्य पालन केन्द्र नजिक अत्तरिया–धनगढी छ लेन सडकखण्डमा मोटरसाइकल दुर्घटना हुँदा चालकको मृत्यु भएको छ।
शनिबार बिहान करिब ३:४० बजे अत्तरियाबाट धनगढीतर्फ आउँदै गरेको सु.प.प्र. ०१–००८ प ५९९८ नम्बरको मोटरसाइकल ओभरस्पिडका कारण आफैँ अनियन्त्रित भई दुर्घटनामा परेको हो।
दुर्घटनामा धनगढी उपमहानगरपालिका–५ तारानगरका १८ वर्षीय पर्वत चौधरी गम्भीर घाइते भएका थिए। उनको टाउको र बायाँ खुट्टामा गम्भीर चोट लागेको थियो। उपचारका लागि सेती प्रादेशिक अस्पताल लगिएकोमा उपचारकै क्रममा बिहान ४:४० बजे चिकित्सकले मृत घोषणा गरेका प्रहरीले जानकारी दिएको छ ।
मोटरसाइकलको पछाडि सवार धनगढीकै १७ वर्षीय लक्ष्मण खातीको दायाँ हात र खुट्टामा चोट लागेको छ। उनको अवस्था मध्यम रहेको र सेती प्रादेशिक अस्पतालमा उपचार भइरहेको प्रहरीले जनाएको छ।
नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय अत्तरिया, कैलालीका प्रमुख प्रहरी उपरीक्षक (एसपी) नवराज कार्कीले दुर्घटनाको प्रारम्भिक कारण अत्यधिक गति (ओभरस्पिड) रहेको देखिएको बताउदै घटनाबारे थप अनुसन्धान भइरहेको बताए ।