काठमाडौं- आज २ जुन। विश्व इतिहासका असंख्य घटनाले आजको दिनको सम्झना दिलाउँछन्। प्रस्तुत छ, आजको दिन भएका केही विश्व चर्चित घटनाको सारसंक्षेप।
– सन् १९५३- एलिजाबेथ द्वितीयाको राज्यारोहण
बेलायतकी महारानी स्वर्गीय एलिजाबेथ द्वितीयाको आजकै दिन राज्यारोहण भएको थियो। उनको राज्यारोहण समारोहलाई पहिलोपटक टेलिभिजनमा देखाइएको थियो। यो टेलिभिजनमा देखाइएको पहिलो अन्तर्राष्ट्रीय समारोह थियो। उनको राज्यारोहणको १६ महिनाअघि उनका पिता राजा जर्ज चौथोको मृत्यु भएको थियो। ८ सेप्टेम्बर २०२२ मा ९६ वर्षको उमेरमा उनको निधन भएपछि हाल उनका छोरा चार्ल्स तृतीय बेलायतका राजा छन्।
– सन् १९७९- कम्युनिस्ट देशमा पोपको पहिलो भ्रमण
पोप जोन पल द्वितीयले सन् १९७९ मा आजकै दिन कम्युनिस्ट शासन रहेको मुलुक पोल्यान्डको भ्रमण गरेका थिए। भ्याटिकनका पोप कुनै कम्युनिस्ट मुलुकको भ्रमणमा निस्केको यो पहिलोपटक थियो।
– सन् १९९९- भुटानमा पहिलोपटक टेलिभिजन
सन् १९९९ मा आजकै दिन भुटानमा पहिलोपटक टेलिभिजन प्रसारण भएको थियो। त्यहाँको सरकारी ब्रोडकास्टिङ सेवाले पहिलोपटक टेलिभिजन सेवा शुरु गरेको थियो।
– सन् २०१५- भुटानमा वृक्षरोपणको विश्व रेकर्ड
सन् २०१५ मा आजकै दिन एक घण्टाभित्र ४९ हजार ६७२ वटा बिरुवा रोपेर वृक्ष रोपणको विश्व रेकर्ड कायम गरिएको थियो। त्यसका लागि भुटानभर १०० स्वयंसेवक खटाइएको थियो।
– सन् २०२०- बेलायत ५० हजार र ब्राजिलमा ३१ हजार मारिए कोभिडबाट
सन् २०२० मा एकै दिनमा बेलायतमा ५० हजार ३२ र ब्राजिलमा ३१ हजार १९९ जनाले कोभिड-१९ महामारीका कारण ज्यान गुमाएका थिए। यो त्यतिबेलाको सर्वाधिक मृत्यु थियो।
– २०२३- ३ रेल जुध्दा भारतमा मारिए २८८
सन् २०२३ मा आजकै दिन भारतको उडिसा राज्यमा तीनवटा यात्रीवाहक रेल आपसमा जुध्दा २८८ जनाको ज्यान गएको थियो। घटनामा १ हजारभन्दा बढी घाइते भएका थिए। उक्त घटना उडिसाको बालासोर जिल्लामा भएको थियो।
– सन् २०२४- चन्द्रमाको दुर्गममा चिनियाँ यान
सन् २०२४ मा आजकै दिन चन्द्रमाको दुर्गम स्थानमा चीनले पठाएको अन्तरिक्ष यान अवतरण भएको थियो। ‘चेन्ज-६’ नामक उक्त यान चन्द्रमाको ढुंगा संकलन र विश्लेषणका लागि पठाइएको हो।