काठमाडौं- आज १३ मार्च। विश्व इतिहासका असंख्य घटनाले आजको दिन स्मरण गराउँछन्। प्रस्तुत छ, तीमध्ये विश्व चर्चित केही प्रमुख घटनाको सारसंक्षेप।
– सन् १७८१- अरुण ग्रह फेला
सन् १७८१ मा आजकै दिन हाम्रो सौर्यमण्डलको अरुण ग्रह (युरानस) पत्ता लागेको थियो। जर्मनीमा जन्मेका ब्रिटिस खगोलशास्त्री विलियम हर्स्चेलले उक्त ग्रह पत्ता लगाएका थिए। यो हाम्रो सौर्यमण्डलको तेस्रो ठूलो ग्रह हो।
– सन् १९४३- जर्मन सैनिकहरूले क्राकोमा गरे हजारौं यहुदीको हत्या
सन् १९४३ मा आजकै दिन जर्मनीको सेनाले क्राकोस्थित यहुदी बस्तीमा हजारौं निहत्था सर्वसाधारणको हत्या गरेको थियो। उक्त त्रासद घटनालाई फिल्म ‘सिन्डलर्स लिस्ट’मा दर्साइएको छ।
– सन् १९९६- स्कटल्यान्डमा विद्यार्थी र शिक्षकको नरसंहार
सन् १९९६ मा आजकै दिन स्कटल्यान्डको डनब्लेनमा एक बन्दुकधारीले अन्धाधुन्द गोली प्रहार गर्दा स्कुले बालबालिका र शिक्षक-शिक्षिका गरी १६ जनाको ज्यान लिएका थिए। उनीहरूको हत्यापछि बन्दुकधारीले पनि आफैंलाई गोली प्रहार गरी आत्महत्या गरेका थिए। यस घटनापछि बन्दुक राख्न पाउनेसम्बन्धी ब्रिटिस कानूनमा ठूलो परिवर्तन आएको थियो।
– सन् १९९७- एरिजोनामा देखिए अज्ञात चम्किला वस्तुको शृंखला
सन् १९९७ मा आजकै दिन अमेरिकाको एरिजोनास्थित फिनिक्सको आकाशमा अज्ञात चम्किला वस्तुहरूको शृंखला देखिएका थिए। ‘फिनिक्स लाइट्स’ नाम दिइएको उक्त घटनाले उडन तस्तरी (यूएफओ)सम्बन्धमा गरमागरम बहसको रूप पाएको थियो। तथापि, त्यसपछि भएका अनुसन्धानले अमेरिकी विमानबाट गिराइएका प्रकाशलाई त्यसको कारक भएको बताएका थिए।
– सन् २०१२- बंगलादेशी फेरी दुर्घटनामा ११० को मृत्यु
सन् २०१२ मा आजकै दिन भएको फेरी (डुंगा) दुर्घटनामा परी ११० जनाले ज्यान गुमाएका थिए। यात्रीवाहक फेरी इन्धन बोकेको पानीजहाजमा ठोक्किँदा उक्त दुर्घटना भएको थियो। घटना बंगलादेशको राजधानी ढाका नजिकै भएको थियो।
– सन् २०१९- बोइङ-७३७ को उडान बन्द
दुर्घटनाको दर बढ्दै गएपछि सन् २०१९ मा आजकै दिन अमेरिकाले सबै बोइङ-७३७ म्याक्स विमानको उडान बन्द गरेको थियो। २९ अक्टोबर २०१८ मा लायन एयरको उडान नम्बर ६१० दुर्घटनामा १८९ जनाको ज्यान गएको थियो। र, १० मार्च २०१९ मा इथोपियन एयरलाइन्सको उडान नम्बर ३०२ दुर्घटनामा १५७ जनाले ज्यान गुमाएका थिए। त्यसलगत्तै उक्त मोडलको विमानको उडानमा विश्वव्यापी प्रतिबन्ध लगाइएको थियो। डिसेम्बर २०२० सम्म उक्त प्रतिबन्ध कायम रह्यो।
– सन् २०२४- टिकटकमाथि अमेरिकी संसदको कडाइ
सन् २०२४ मा आजकै दिन अमेरिकी संसदको तल्लो सदन प्रतिनिधि सभाले चिनियाँ सामाजिक सञ्जाल टिकटकमाथि कडा निर्देशन जारी गरेको थियो। संसदले टिकटकको सञ्चालक कम्पनी बाइटडान्सलाई या त टिकटक बिक्री गर्न या प्रतिबन्ध सामना गर्न चेतावनी दिएको थियो। अमेरिकी सांसदहरूले उक्त चेतावनीका पक्षमा मतदान गरेका थिए।