काठमाडौँ । प्रधानमन्त्री शेरबहादुर देउवालाई नेकपा एमालेका अध्यक्ष केपी शर्मा ओलीले ज्योतिषलाई हेराउन आग्रह गरेका छन् । उनले देउवालाई आफ्नै न्योतिषलाई देशको भविष्यबारे हेराउन आग्रह गरेका हुन् ।

‘गठबन्धनको अशुभ दिन यही ३० गते हो, उहाँहरूले कस्तो दिनमा चुनावको मिति राख्नु भएछ,’ ओलीले भने, ‘म प्रधानमन्त्री जीलाई भन्न चाहन्छु, तपाईं आफ्नै ज्योतिषलाई हेराउनु ।’

उनले आफूहरूले चाहे हप्ता दिनमा नै गठबन्धनको सरकार ढल्ने दाबी गरे । ‘बिरालो किन्नै पर्दैन नि, जसले ठूलो भाँडोमा दूध भात दिन्छ उसकोमा बिरालो जान्छ नि, सरकार बनाउनु पनि यही हो,’ उनले भने ।

आगामी वैशाख ३० गते हुने स्थानीय तहको निर्वाचनका लागि एमालेले राखेको पत्रकार सम्मेलनमा बोल्दै उनले गठबन्धनविरुद्ध रिस पोखेका हुन् ।