काठमाडौँ । टेस्ला कम्पनीका सीईओ एलोन मस्क सोशल मिडिया प्लेटफर्म ट्वीटर खरिद गरेसँगै सोशल मिडियामा सक्रिय छन् । ट्वीटर खरिद गरेसँगै उनले छिट्टै कोकाकोला किन्ने बताएका छन् ।
मस्कले ट्वीटमा भने, ‘अब कोका कोला किन्दै छु ताकी यसमा कोकेन पुनः मिसाउन सकोस् ।’ उनको ट्वीटलाई अहिलेसम्म लाखौँले लाइक र रिट्विट गरेका छन् ।
यो ट्वीटको केही समयपछि मस्कले अर्को ट्वीट गरे । यसमा भनिएको थियो, ‘ट्विटरलाई अझ रमाइलो ठाउँ बनाउनु पर्छ ।’
लगत्तै, मस्कले आफ्नो अघिल्लो ट्वीटको स्क्रिनसट पनि पोस्ट गरे जसमा उनले भनेका थिए, ‘म म्याकडोनाल्ड्स किन्न जाँदै छु र सबै आइसक्रिम मेसिनहरू ठिक गर्ने छु । उसले ठट्टा गर्दै आफैलाई जवाफ दिए, सुन, म चमत्कार गर्न सक्दिनँ ।’
एलोन मस्कले माइक्रो ब्लगिङ साइट ट्वीटर किन्न ४४ अर्ब डलर अर्थात तीन हजार ३६८ अर्ब रुपैयाँको सम्झौता गरेका थिए । ट्विटरको प्रत्येक शेयरका लागि उनले ५४.२० डलर लगानी गरेका थिए ।
ट्वीटरमा उनको पहिले नै ९ प्रतिशत सेयर खरिद गरेका थिए । उनी ट्वीटरको सबैभन्दा ठूलो सेयर होल्डर थिए । पछिल्लो सम्झौतापछि कम्पनीमा उनको शतप्रतिशत हिस्सेदारी छ । अब ट्वीटर उनको निजी कम्पनी बनेको छ ।
