काठमाडौँ । चक्कु प्रहारबाट अछाममा चार जना घाइते भएका छन् । ढकारी गाउँपालिका १ का मान बहादुर बुढा, हिक्मत बहादुर बुढा, तुलसी बुढा र खगेन्द्र बुढामाथि बुधबार राति चक्कु प्रहार भएको हो ।

उनीहरूमाथि स्थानीय तपेन्द्र बुढालगायत १० जनाको समूहले चक्कु प्रहार गरी घाइते बनाएको जिल्ला प्रहरीले कार्यालय अछामले जनाएको छ ।

स्थानीयको विवाह भोजमा मदिरा सेवन गरेसँगै दुई पक्षबीच झडप भएको थियो । ढुंगा हानहानबाट शुरु भएको झडप चक्कु प्रहारसम्म हुँदा चार जना घाइते भएका हुन् ।

चक्कु प्रहार गर्ने तपेन्द्रलाई प्रहरीले नियन्त्रणमा लिएको छ । अन्य फरार रहेको प्रहरीले जनाएको छ ।

चक्कु प्रहारबाट घाइते भएकाहरूको स्वास्थ्य चौकी ढकारीमा सामान्य उपचारपछि थप उपचारका लागि जिल्ला अस्पताल पठाइएको छ । उनीहरुको अवस्था मध्यम रहेको प्रहरीले जनाएको छ ।