अमेरिकी विदेश मन्त्री एन्टोनी ब्लिनकेन र रक्षा मन्त्री ल्योयिड अस्टिन कुनै पूर्वघोषणाबिना युक्रेन पुगेका छन्। युक्रेनमा दुई नेताले राष्ट्रपति भोलोदिमिर जेलेन्स्की र उनका शीर्ष अधिकारीहरूसँग छलफल गरेका छन्।
दुई पक्षबीच तीन घण्टा लामो छलफल भएको ब्लिनकेनले जानकारी दिएका छन्। भेटघाटपछि पत्रकारहरूसँगको कुराकानीमा ब्लिनकेनले आफूहरू दक्षिण–पश्चिम पोल्यान्डबाट रेल चढेर युक्रेनको राजधानी किभ पुगेको जानकारी दिए।
किभमा ब्लिनकेन र अस्टिनले जेलेन्स्कीका अतिरिक्त युक्रेनी विदेश मन्त्री दिमित्रो कुबेला, रक्षा मन्त्री ओलेक्सिए रेज्निकोभ र गृह मन्त्री डेनिस मोनास्ट्रीस्कीसँग भेटघाट गरे।
‘हाम्रो भ्रमणको मुख्य विषय आगामी दिनमा हामीले उठाउनुपर्ने कदमबारे केन्द्रित रह्यो,’ ब्लिन्केनले पत्रकारहरूलाई भने।
साथै, ब्लिनकेनले आगामी सातादेखि अमेरिकी कूटनीतिज्ञहरू युक्रेन फर्कन शुरु गर्ने जानकारी पनि दिए।
‘शुरुका चरणमा युक्रेन आउने कुटनीतिज्ञले यहाँ दूतावास खोल्ने सम्भावनाबारे मूल्यांकन गर्नेछन्। मेरो विचारमा त्यसका लागि एक दुई साता लाग्नेछ,’ ब्लिनकेनले भने।
युक्रेनमा रुसले आक्रमण गर्ने गुप्तचर सूचना पाएलगत्तै अमेरिकाले त्यहाँ रहेका उसका कूटनीतिज्ञलाई छिमेकी मुलुक स्थानान्तरण गरेको थियो।
‘हामी कुटनीतिज्ञहरूलाई फर्काउने विषयमा ध्यान दिएर कदम उठाइरहेका छौं। यसमा हामीले हाम्रा कर्मचारीको सुरक्षालाई सबैभन्दा बढी प्राथमिकता दिएका छौं,’ अमेरिकी विदेश मन्त्रीको स्पष्टीकरण थियो।
ब्लिनकेनले युक्रेनमा खाली रहेको राजदूतमा ब्रिजिट बिन्कलाई नियुक्त गरिने पनि जानकारी दिए। सन् २०१९ मा म्यारी योभानोभिच फिर्ता बोलाइएयता युक्रेनमा अमेरिकी राजदूत पद खाली थियो। ब्रिन्क अहिले स्लोभाकियाका अमेरिकी राजदूत हुन्।
सीएनएनबाट