इम्यानुयल म्याक्रोन दोस्रोपटक फ्रान्सका राष्ट्रपतिमा चुनिएका छन्। उनले उग्र दक्षिणपन्थी मरिन ल पेनलाई सोचेभन्दा बढी मतान्तरले हराउँदै राष्ट्रपतिमा पुनः निर्वाचन भएका हुन्। म्याक्रोनले खसेको कुल मतको ५८.५५ प्रतिशत पाएका छन् भने उनका प्रतिद्वन्द्वी पेनले ४१.५ प्रतिशत मत पाएकी छन्।
जितपछि आइफेल टावरमुनि आयोजित विजय सभालाई सम्बोधन गर्दै म्याक्रोनले ‘सबै फ्रेन्च जनताको राष्ट्रपति’ बन्ने घोषणा गरेका छन्। हारका बावजुद ल पेनले हासिल गरेको उच्च मतका आधारमा अफूलाई विजयीजस्तै ठानेको बताएकी छन्। उनको पार्टी नेसनल ¥यालीले बोकेको विचारले नयाँ उचाइ हासिल गरेको उनको दाबी छ। पटक–पटक राष्ट्रपति चुुनावमा लडेकी ल पेनले विगतका कुनै राष्ट्रपतिको चुनावमा भन्दा बढी मत हासिल गरेकी छन्।
म्याक्रोनले जितपछिको सम्बोधनमा फ्रेन्च मतदातामाझ बढेको उग्र दक्षिणपन्थीप्रतिको मोहको कारण खोजेर त्यसलाई सम्बोधन गर्नुपर्ने बताए। ‘हाम्रा जनतामा त्यस्तो के आक्रोश र असहमति छ, जसका कारण उग्र दक्षिणपन्थीले यति धेरै मत पाइरहेका छन् ? यसको जवाफ पहिल्याउनुपर्छ। त्यो मेरो र मेरा सहकर्मीको जिम्मेवारी भयो,’ म्याक्रोनले भने।
म्याक्रोनको जितलाई युरोपेली नेताहरूले सन्तोषपूर्ण भाषामा स्वागत गरेका छन्। उनीहरू युरोपेली संघविरोधी नीति प्रस्तुत गरिरहेकी ल पेनको जितको आशंकाबाट त्रस्त थिए। ‘हामी मिलेर फ्रान्स र युरोपलाई अगाडि बढाउनेछौं,’ युरोपेली कमिसनकी अध्यक्ष उरसुला भोन डेर लेयेनले भनिन्।
म्याक्रोनको पक्षमा मत हाल्न सार्वजनिक आह्वान गरेका युक्रेनका राष्ट्रपति भोलोदिमिर जेलेन्स्कीले ‘असल मित्र’को जितप्रति बधाइ ज्ञापन गरेका छन्। उनले बलियो युरोपको पक्षमा काम गर्नुपर्ने बताए।
चुनावमा ७२ प्रतिशत मतदाताले मतदान गरे, जुन सन् १९६९ को दोस्रो चरणको निर्वाचनपछिकै कम उपस्थिति हो।