बेइजिङ- कोभिड-१९ महामारीको ५ वर्षपछि चीनमा फेरि एक श्वासप्रश्वाससम्बन्धी रोग फेला परेको छ। उक्त रोग फैलाउने भाइरसलाई हुमन मेटान्युरोमोभाइरस (एचएमपीभी) नाम दिइएको छ।
चीनका सामाजिक सञ्जालमा एचएमपीभी भाइरसका बारेमा समाचारहरू भाइरल भइरहेका छन्। अस्पतालहरूमा बिरामीको चाप ह्वात्तै बढ्दा उपचारका लागि बेड अभाव भइरहेको बताइएको छ।
चीनका स्वास्थ्य अधिकारीहरूले उक्त भाइरसको संक्रमणसँग जुध्न केही प्रोटोकलहरू लागू गरेका छन्। तथापि, तत्काल कुनै आपतकालीन अवस्था लागू हुने सम्भावना देखिएको छैन।
कतै यो भाइरसले पनि कुनै महामारीको रूप त लिँदैन भन्ने आशंका भने पैदा भएको छ। किनकि, कोभिड-१९ महामारीका शुरुवाती दिनमा यस्तै प्रकारको अवस्था देखिएको थियो।
नेपालको छिमेकी भारतमा पनि एचएमपीभी संक्रमणका तीनवटा केस देखिइसकेका छन्। पहिलो बिरामी अहमदावाद र अन्य दुई कर्नाटकमा भेटिएका छन्।
संक्रमितमध्ये ८ महिनाका बालक र ३ महिनाकी बालिका छन्। उक्त भाइरसले २ वर्षभन्दा कम उमेरका बालबालिका र ६५ वर्षभन्दा माथिका ज्येष्ठ नागरिकलाई बढी प्रभावित गरेको पाइएको छ।
यो एक प्रकारको आरएनए भाइरस हो। र, सर्दी लागेको मानिसलाई देखिनेजस्तो लक्षण देखाउँछ। खोकी लाग्ने, घ्यारघ्यार हुने, नाकबाट सिंगान बग्ने लक्षण देखिन्छन्। विस्तारै सास लिन कठिन हुन्छ।
विश्व स्वास्थ्य संगठनले एचएमपीभी भाइरसलाई लिएर कुनै अपडेट जारी गरेको छैन। चिनियाँ स्वास्थ्य मन्त्रालयले स्थिति असामान्य नरहेको बताएको छ। र, गत वर्षको तुलनामा यस वर्षको श्वासप्रश्वाससम्बन्धी रोग कम गम्भीर रहेको बताएको छ।