अमेरिकाले रुसी राष्ट्रपति भ्लादिमिर पुटिन र विदेशमन्त्री सर्गेई लाभारोभको परिवारमाथि प्रतिबन्ध लगाएको छ।

अमेरिकाको प्रतिबन्धमा पुटिनका दुई छोरी र लाभारोभका केही नातेदार छन्। युक्रेनमाथि नरसंहारकारी आक्रमण गरिरहेको रुसविरुद्ध अमेरिकालगायत विभिन्न मुलुकले धमाधम प्रतिबन्ध लगाइरहेका छन्।

प्रतिबन्धको सूचीमा रुसका प्रभाशाली व्यक्तिहरू, बैंक र विभिन्न कम्पनी छन्। उनीहरूले युक्रेनमाथि आक्रमण गर्न पुटिनलाई साथ दिएको कारण प्रतिबन्ध लगाइएको हो।

प्रतिबन्ध लगाइएका पुटिनका छोरीहरूको नाम अमेरिकाले लिएको छैन। तर, उनकी पूर्वपत्नी ल्युडमिलाले जन्म दिएका मारिया भोरोन्त्सोभा र क्याटेरिना तिखोनोभामाथि अमेरिकाले प्रतिबन्ध लगाएको हो।

पुटिनले आफ्नो पारिवारिक जानकारी गोप्य राख्दै आएका छन्। तर, आफ्नो दुई छोरी रहेको बताउने गरेका छन्। सन् १९८५ मा जन्मेकी भोरोन्त्सोभा एन्डोक्राइनोलोजिस्ट हुन् र एक मेडिकल काउन्सिलकी मालिक छिन्। यस्तै, सन् १९८६ मा जन्मेकी तिखोनोभा शिक्षा र व्यापारिक क्षेत्रमा जोडिएकी छन्। उनी नृत्यांगना हुन्। उनले अन्तर्राष्ट्रिय रक एन्ड रोल प्रतिस्पर्धामा सहभागिता जनाउने गरेकी छन्।