राष्ट्रिय समाचार समिति

संखुवासभाको भोटखोला जग्गा प्रकरणका आरोपित सात जनाविरुद्ध संगठित अपराधमा छानविनका लागि संखुवासभा जिल्ला अदालतले १५ दिन थप गरेको छ।

जग्गाधनीलाई जानकारी नै नदिई २७ रोपनी रजिस्ट्रेसन पास गर्न भोटखोला गाउँपालिका–४ का वडाध्यक्ष किन्साङ भोटे, मालपोत कार्यालयका नायब सुब्बा महेन्द्र पराजुलीसहित सात जनाविरुद्ध संगठित अपराधमा अनुसन्धानका लागि १५ दिन म्याद थप गरिएको अदालतका स्रेस्तादार केदार गौतमले जानकारी दिए।

जग्गा जालसाजी गरेको आरोपमा पक्राउ परेका वडाध्यक्ष भोटे र नासु पराजुलीसहित सात जनाविरुद्ध म्याद थप गरेर थप अनुसन्धान भइरहको जिल्ला प्रहरी प्रमुख डीएसपी लालध्वज सुवेदीले बताए। यस्तै, भोटखोला–४ का सुरेन्द्र तामाङ, कप्पना भोटे, ङिमालाजुङ भोटे, मकालु गाउँपालिका–४ घर भई खाँदबारीमा लेखापढी व्यवसाय गर्ने अनिष गुरुङ र चैनपुर नगरपालिकाका पासाङ शेर्पालाई पनि सोही अपराधमा म्याद थप गरी अनुसन्धान गरिरहेको उनले जानकारी दिए। संगठित अपराधअन्तर्गतको मुद्दामा ६० दिनसम्म हिरासतमा राखेर अनुसन्धान गर्न पाइने व्यवस्था छ।

संखुवासभाको भोटखोला गाउँपालिका–४ की विममाया तामाङका नामबाट जालसाजी गरी ठगी गरेको भन्दै २२ फागुनमा जिल्ला प्रशासन कार्यालयमा उजुरी परेको थियो। स्थानीय दलबहादुर तामाङका नाममा रहेको करिब तीन करोड रुपैयाँ पर्ने कित्ता नम्बर २७५ र २८० को २७ रोपनी जग्गा गत फागुन १ र २ मा वडाध्यक्ष भोटे र मालपोत कार्यालयका नासु पराजुलीको मिलेमतोमा रजिस्ट्रेसन पास गराइएको थियो।

वृद्धभत्ताको कागज भन्दै औँठा छाप लगाउन लगाई तामाङको फागुन १ मा नागरिकताको प्रतिलिपिसमेत निकालिएको थियो। आफ्नो नाममा जमिन आएलगत्तै २७५ कित्ताको जग्गा पासाङ शेर्पा र २८० कित्ताको जग्गा कल्पना भोटे र डिमालाजुङ भोटेका नाममा संयुक्त रूपमा पास गरिएको विममायालाई पत्तै थिएन। कल्पनाको हकमा लेखापढी व्यवसायी अनिश गुरुङका नाममा वारेस राख्न दिइए पनि वारेसनामाको कागजपत्र नक्कली भएको प्रहरीले जनाएको छ।

मालपोतमा जग्गा पास भइसकेपछि सुरेन्द्रले वृद्धभत्ता भन्दै विममायालाई २० हजार रुपैयाँ दिएको पीडितको भनाइ थियो। विममायाको नाममा जग्गा नामसारी गर्न वडाध्यक्ष भोटेले सदरमुकाममा बसेर नागरिकताको प्रतिलिपि, घरबाटो प्रमाणित, जग्गा नामसारीको सिफारिस बनाएका थिए। बिक्री भएको दुई कित्तामध्ये २७५ नम्बरको जग्गा फागुन १६ मा पासाङबाट कविता पराजुलीका नाममा रजिस्ट्रेसन पास गरिएको थियो।

डीएसपी सुवेदीका अनुसार उनीहरूले माथिल्लो अरुण जलविद्युत् आयोजनास्थलको मुआब्जा क्षेत्रमा पर्ने जग्गा मात्रै झुक्याएर पास गरिएको देखिएको छ। अन्य चार कित्ता भने विममायाकै नाममा सुरक्षित छ। मुआब्जाभित्र पर्ने २७ रोपनी जग्गाको केवल एक लाख रुपैयाँको थैली राखेर पास गरिएको र त्यसमा पनि जग्गाधनी विममायालाई २० हजार रुपैयाँ मात्रै दिइएको प्रहरी अनुसन्धानले देखाएको छ। पक्राउ परेकालाई ठगी र कीर्ते मुद्दा चलाइने प्रहरीले जनाएको छ।

उक्त जग्गा १०६३ मेगावाट क्षमताको उक्त जलविद्युत् आयोजना निर्माण क्षेत्रमा पर्छ। आयोजनाले यो क्षेत्रमा मुआब्जाबापत प्रतिरोपनी कम्तीमा पाँच लाख रुपैयाँ निर्धारण गरेको थियो  । गाउँपालिकाको वडा नम्बर २, ४ र ५ का विभिन्न स्थानमा उक्त आयोजना निर्माणका लागि अध्ययन, जग्गा सर्वे र जग्गाप्राप्तिको काम तीव्र छ।

को हुन् विममाया ?

उक्त जग्गा प्रकरणमा विममाया भनेर प्रस्तुत भएकी महिला स्वयं चिण्डीमाया तामाङका भएको पाइएको छ। गत २२ फागुनमा विममाया तामाङका नामबाट जालसाजी गरी ठगी गरेको भन्दै जिल्ला प्रशासन कार्यालयमा उजुरी गर्ने व्यक्तिको नागरिकताको प्रमाणपत्रबाहेक अन्यत्र कहीँ भेटिएको छैन। अहिलेसम्म चिण्डीमाया नै विममाया भनेर परिचित छिन्। जन्म, विवाह, मृत्युलगायत व्यक्तिगत घटना प्रमाणित गर्ने वडाध्यक्षले दलबहादुर तामाङको उत्तराधिकारी चिण्डीमायालाई विममाया भनेर सिफारिस र प्रमाणित गर्नु रहस्यमय बनेको छ। जग्गाधनी दलबहादुर तामाङको ०५८ सालमै मृत्यु भइसकेको, सन्ततिका रूपमा एक मात्र छोरी चिण्डीमाया भए पनि विममायालाई उत्तराधिकारी बनाई उनकै नाममा जग्गा नामसारी गरिएको छ थियो।

१ फागुनमा विममायाका नाममा जिल्ला प्रशासन कार्यालयबाट नागरिकताको प्रमाणपत्रको प्रतिलिपि निकालियो। भोलिपल्ट सोही नागरिकताको प्रमाणपत्रको प्रतिलिपिमा उल्लेखित विममायाका नाममा मालपोत कार्यालयबाट दलबहादुरका नाममा रहेको ६ कित्ता जग्गा नामसारी गरियो। त्यसै दिन विममायाका नाममा नामसारी भइआएका ६ कित्ता जग्गामध्ये अधिग्रहणमा परेका दुई कित्ता जग्गा कित्ता नम्बर २८० को करिब २४ रोपनी कल्पना र ङिमालाजुङको संयुक्त नाममा र कित्ता नम्बर २७५ का करिब तीन रोपनी जग्गा पासाङका नाममा राजीनामा पास गरी जग्गाको रजिष्ट्रेसन गराइएको थियो। सोही गाउँपालिकाभित्र निर्माण हुन लागेको जलविद्युत् आयोजनाले अधिग्रहणमा परेका जग्गाहरूको कित्ता नम्बर र क्षेत्रफलसहितको सूचना प्रकाशन गरेपछि यो घटनाको बिजारोपण भएको थियो।