दाइसँग मिलेर सहपाठीले नै हत्या गरेको प्रहरी भनाइ, दुवै पक्राउ
उदयपुरमा मंगलबार बिहान ट्युसन पढ्न घरबाट विद्यालय हिँडेकी बालिकाको बाटैमा हत्या भएको छ । हत्या आरोपमा प्रहरीले सहपाठी र उनका दाइलाई पक्राउ गरेको छ । बेलका नगरपालिका– ३ की १६ वर्षीया कविता सुनुवारको हत्या भएको हो । प्रहरीले कवितासँगै विद्यालय जाउआउ गर्ने सहपाठी १६ वर्षकै सरिता ढकाल खत्री र उनका दाइ ठुला बुबाका छोरा १९ वर्षीय विनोद ढकाल लाई पक्राउ गरेको छ । विनोदसँग मिलेर सरिताले हत्या गरेको प्रहरीको प्रारम्भिक निष्कर्ष छ ।
कविता र सरिता स्थानीय कोसी जनता माध्यमिक विद्यालय रामपुरमा कक्षा १० मा अध्ययन गर्थे । एक किलोमिटर दूरीभित्रै घर भएका उनीहरू सधैँझैँ मंगलबार बिहान पनि प्रवेशिका परीक्षाको ट्युसन पढ्न सँगै विद्यालय गएका थिए । प्रहरीका अनुसार विनोद पनि बहिनी सरितालाई विद्यालय पुर्याउन भन्दै घरबाट निस्किएका थिए । बाटोमा विवाद भएपछि सरिताले दाइसँग मिलेर कविताको हत्या गरेको जिल्ला प्रहरी कार्यालय उदयपुरका एसपी सुवासचन्द्र बोहराले बताए ।