युक्रेनका राष्ट्रपति भोलोदिमिर जेलेन्स्कीले आफ्नो बुचा शहरमा रुसले ३०० भन्दा बढी निहत्था सर्वसाधारणको हत्या गरेको बताएका छन्।
उनका अनुसार उक्त शहरमा रुसको युद्ध अपराधका प्रशस्त प्रमाण फेला परेका छन्। ‘हामी बुचा शहरमा रुसको नरसंहार र युद्ध अपराधमाथि अनुसन्धान गरिरहेका छौँ,’ जेलेन्स्कीले भने, ‘अहिले बुचा शहरमा तीन सयभन्दा बढी सर्वसाधारणको निर्ममतापूर्वक हत्या गरिएको जानकारी आएको छ। हाम्रो अनुसन्धान पूर्ण भएपछि यो संख्या अझै बढी रहेको तथ्य सार्वजनिक हुन सक्छ।’
रुसको कब्जामा परेका बोरोडियालगायत शहरमा पनि रुसको युद्ध अपराधका प्रशस्त प्रमाण रहेको उनले बताए। ‘किभ, चेयरनिभ र सुमी क्षेत्रका गाउँहरूमा रुसी सेनाले त्यस्तो अत्याचार गरेको छ, जो ८० वर्षअघि नाजीहरूले गरेका थिए,’ उनले भने।
अमेरिकी राष्ट्रपति जो बाइडेनले रुसी राष्ट्रपति भ्लादिमिर पुटिनमाथि युद्ध अपराधको मुद्दा अगायिड बढाउन आग्रह गरिसकेका छन्। रुसमाथि अझ कडा प्रतिबन्ध लगाउने तयारीमा अमेरिका रहेको उल्लेख गर्दै बाइडेनले पुटिनलाई अति क्रुर व्यक्तिको रूपमा चित्रण गरेका छन्।