ग्वान्टानामो खाडीस्थित अमेरिकी डिटेन्सन सेन्टरमा २० वर्ष बन्दी रहेका सुफियान बरहुमीलाई अमेरिकाले अल्जेरिया सुपुर्दगी गरेको छ।
बरहुमी २० वर्षअघि सन् २००२ मा पाकिस्तानमा एकजना शीर्ष अलकायदा नेता सँगसँगै पक्राउ परेका थिए।
बरहुमीमाथि अमेरिकाविरुद्ध बम हमलाको तयारी गरेको आरोप लगाएको थियो। अमेरिकाको रक्षा मन्त्रालयले बरहुमीलाई नियन्त्रणमा राखिरहनुपर्ने आवश्यक नरहेको बताएको छ।
अल्जेरियाले बरहुमीलाई मानवीय व्यवहार गर्ने वाचा गरेपछि उनलाई सुपर्दगी गरेको अमेरिकाको भनाइ छ।
अमेरिकाको रक्षा मन्त्रालयले बरहुमीलाई ‘सुरक्षा प्रत्याभूति दिलाएर’ उनकै जन्ममुलुक पठाउन सिफारिस गरेको थियो।
‘अमेरिकाले ग्वान्टानामो खाडीस्थित डिटेन्सन सेन्टरका कैदीहरूलाई जिम्मेवारपूर्ण रूपमा घटाउँदै लगेर सो केन्द्र बन्द गर्ने प्रक्रियामा काम गरिरहेको छ। यसमा सघाउन तत्परता देखाउने अल्जेरियालगायत अन्य मित्रहरूप्रति अमेरिका धन्यवाद व्यक्त गर्छ,’ रक्षा मन्त्रालयले जारी गरेको विज्ञप्तिमा भनिएको छ।
त्यसबाहेक रक्षा मन्त्रालयले बरहुमीबारेमा कुनै विस्तृत विवरण दिएको छैन। अल्जेरियाले पनि यस विषयमा सार्वजनिक टिप्पणी गरेको छैन।
ग्वान्टानामो खाडीको अमेरिकी डिटेन्सन क्याम्पबाट बरहुमी रिहा भएपछि सो केन्द्रमा ३७ कैदी बाँकी रहेको मन्त्रालयले जनाएको छ। तीमध्ये १८ जना सुपुर्दगीका लागि योग्य छन्।
क्युवाको दक्षिणपूर्वी भेगमा रहेको ग्वान्टानामो खाडीमा अमेरिकी जल सेनाले पहिलेदेखि आधार राखेको छ।
सन् २००२ देखि त्यसलाई डिटेन्सन केन्द्रलाई अमेरिकाले सञ्चालन गरेको ‘वार अन टेरर’को क्रममा लडाकूहरूलाई नियन्त्रण गर्न प्रयोग गरेको थियो।
बीबीसीबाट