काठमाडौँ । वर्तमान पदाधिकारिहरू एकलौटी रुपमा अघि बढेर संस्था कब्जा गर्ने प्रयास भएको हुँदा यस परिस्थितिबाट संस्था बचाउन भन्दै पाटा नेपाल च्याप्टरका पूर्वअध्यक्ष सुमन पाण्डे कानुनी उपचारमा जाने भएका छन् ।
प्यासिफिक एसिया ट्राभल एसोशियसनअन्तर्गतको ‘पाटा नेपाल च्याप्टर’ केही व्यक्तिहरूको व्यक्तिगत स्वार्थ तथा अपारदर्शी क्रियाकलापका कारण संस्था अधोगतितर्फ गइरहेको हुँदा कानुनी उपचारमा जाने अवस्था आएको पूर्वअध्यक्ष पाण्डेले बताए ।
‘पाटा नेपाल च्याप्टर’को २८ चैतमा हुन लागेको साधारण सभाबाट संशोधित विधान निलम्बन गरेर सहभागी तथा प्रतिस्पर्धामूलक निर्वाचन सम्पन्न गर्न पहल भइरहेका बेला १६ चैतमै निर्वाचन कार्यक्रम सार्वजनिक गरी निर्धारित व्यक्ति मात्र संलग्न हुने अवसर प्रदान गरेको पाण्डेको आरोप छ ।
उक्त निर्वाचन कार्यक्रम स्थगनका लागि १६ चैतकै दिन जिल्ला प्रशासन कार्यालयमा निवेदनसमेत दर्ता गराइसकेको उनले बताए । यससँगै पाण्डेले आइतबार (२०, चैतमा) संस्थाको निर्वाचन स्थगनको माग राख्दै अदालतमा मुद्दा दायर गर्ने जानकारीसमेत दिए ।
पाण्डे सन् २०१३ जनवरीदेखि २०१७ डिसेम्बरसम्म पाँच वर्ष ‘पाटा नेपाल च्याप्टर’को अध्यक्ष रहेका थिए ।