काठमाडौं- हालै एउटा अनुसन्धान गरिएको थियो, जसमा अर्को महामारी हिमनदी पग्लिएका कारण निम्तिने चेतावनी दिइएको थियो।
अनुसन्धानमा कोरोनाका सबै प्रकारका खतरनाक भाइरस र ब्याक्टेरिया हिमनदीमा लुकेको भनिएको थियो। वैज्ञानिकले यी हिमनदीमा भाइरस पाउन थालिसकेका छन्।
बरफ पग्लिरहेका छन् र यहाँबाट प्राचीन जीव निस्किन थालेका छन्। यी प्राचीन भाइरसको फिर्ती मानव सभ्यताका लागि राम्रो संकेत होइन। बरफ पग्लिएपछि बाहिर आएका यी भाइरस वातावरणमा फैलिन सक्छन्।
माइक्रोबायोममा प्रकाशित शोधअनुसार अनुसन्धानकर्ताले तिब्बती पठारको गुलिया आइस क्याम्पबाट दर्जनौं अचम्मका भाइरसको पहिचान गरेका छन्। यो भाइरस करिब १५ हजार वर्ष पुरानो दाबी गरिएको छ। शोधका मुख्य लेखक तथा ओहियो स्टेट युनिभर्सिटीका माइक्रोबायोलोजिस्ट जि पिङ झोङले यी हिमनदी विस्तारै बनेको बताए।
पछिल्ला अध्ययनबाट सुक्ष्मजीव समुदायको सम्बन्ध, वातावरणमा धुलो र आयन सान्द्रतामा परिवर्तनसँग जोडिएको पत्ता लागेको छ। यसले त्यतिबेलाको जलवायु र पर्यावरणीय परिस्थितिको पनि संकेत दिन्छ। चीनमा समुद्र सतहबाट ६.७ किलोमिटर उचाइमा रहेको पुरातन समयका यी जमेका हिमनदीमा ३३ मध्ये २८ वटा भाइरस पहिले कहिल्यै नदेखिएको अनुसन्धानकर्ताहरूले बताएका छन्।
ओहियो स्टेट युनिभर्सिटीका माइक्रोबायोलोजिस्ट म्याथ्यू सुलिवनका अनुसार यो यस्ता भाइरस हुन्, जुन कठिन वातावरणमा हुर्किएका होलान्। ज्ञात भाइरसको डाटाबेसले यी भाइरसको जेनेटिक सिक्वेन्सको तुलना गर्दा बरफमा भेटिएका सबैभन्दा धेरै भाइरस ब्याक्टिरियोफेज भाइरस थिए, जुन मिथाइलोब्याक्टेरियमलाई संक्रमित गर्छन्। मिथाइलोब्याक्टेरियम ब्याक्टेरिया बरफभित्र मिथेन चक्रका लागि महत्त्वपूर्ण हुन्छन्।