रुसविरुद्ध लड्न जर्मनीले युक्रेनलाई एक हजार ५०० थान क्षेप्यास्त्र पठाएको छ। जर्मनीका सञ्चार माध्यमहरूका अनुसार एक हजार ५०० थान स्ट्रेला नामक एन्टी-एयरक्राफ्ट मिसाइल र एक सय थान एमजी-३ मेसिन गन युक्रेन पुगेका छन्।

जर्मनीकी विदेशमन्त्री एनालिना बारबकले गत बुधबार मात्र युक्रेनमा मिसाइलहरू पठाउन ढिलाइ भइरहेको बताएकी थिइन्। उनले बुधबार नै तत्काल ती मिसाइल र मेसिन गन पठाइन लागेको बताएकी थिइन्।

युद्धग्रस्त मुलुकमा हतियार नपठाउने जर्मनीको विदेश नीति छ। तर, उक्त नीति परिवर्तन गर्दै जर्मनी युक्रेनलाई हतियारको मद्दत दिएको हो। युक्रेनमाथि रुसको आक्रमणपछि जर्मनीको विदेश नीतिमा बदलाव देखिएको छ।

‘हामी संसारका सबैभन्दा ठूला हतियार निर्यातकमध्ये एक हौँ। युक्रेनमा हतियार पठाउनु हाम्रा लागि गर्वको विषय त होइन। तर, युक्रेनलाई मद्दतका लागि हतियार पठाउनैपर्ने भयो,’ विदेशमन्त्री एनालिनाले समाचार एजेन्सी रोयटर्ससँग भनिन्।