काठमाडौँ । विश्वको सबैभन्दा खुसी देशको सूचीमा फिनल्याण्ड पुनः पहिलो स्थानमा रहन सफल भएको छ । वल्र्ड ह्याप्पिनेस रिपोर्ट २०२२ ले सार्वजनिक गरेको रिर्पोटअनुसार फिनल्याण्डलाई विश्वकै सर्वाधिक खुसी देश घोषणा गरेको हो ।

वल्र्ड ह्याप्पिनेस रिपोर्टको सूचीमा फिनल्यान्ड लगातार पाँचौँपटक संसारकै सबैभन्दा खुसी देश बन्न सफल भएको हो। प्रतिव्यक्ति वास्तविक जीडीपी, सामाजिक समर्थन, स्वस्थ औषत आयु, जीवन छनौट गर्ने स्वतन्त्रता, उदारता र भ्रष्टाचारको धारणाहरू जस्ता विभिन्न विषयका आधारमा विश्व खुसी प्रतिवेदन मापन गरिन्छ ।

सूचीमा डेनमार्क र आइसल्याण्ड क्रमशः दोस्रो र तेस्रो स्थानमा छन्। त्यस्तै, स्वीट्जरल्याण्ड चौथो स्थानमा छ भने नेदरल्याण्डस् र लक्जमवर्ग क्रमशः पाँचौ र छैटौँ स्थानमा छन्। स्वीडेन, नर्वे र इजरायल क्रमशः सातौँ, आठौँ र नवौँ स्थानमा छन् भने र न्युजिल्याण्ड दशौँ स्थानमा छ ।

नेपालको अवस्था कस्तो ?

नेपाल दक्षिण एसियामा सबैभन्दा खुसी हुने देश बनेको छ । नेपाल सूचीको ८५ औँ स्थानमा हुँदै दक्षिण एसियामा सबैभन्दा बढी खुसी हुने देशको सूचीमा परेको हो।

नेपालपछि बुलगेरिया र माल्दिम्भ छन्। सूचीमा बंगलादेश ९९ र पाकिस्तान १०३ औँ नम्बरमा छन्। श्रीलंका १२६ औँ स्थानमा हुँदा भारत १३६औँ स्थानमा छ।

सूचीअनुसार अफगानिस्तान विश्वकै सबैभन्दा दुःखी देश बनेको छ। अफगानिस्तानपछि सूचीमा लेबनान र जिम्बाबे छन्।

सूचीमा नेपालभन्दा तीन स्थानमाथि अर्थात ८२ औँ नम्बरमा चीन छ भने युक्रेनमाथि हमला गरिरहेको रुस ७४ औँ स्थानमा छ। त्यस्तै, युक्रेन १०८ औँ स्थानमा छ।