काठमाडौँ । ऊर्जा, जलस्रोत तथा सिँचाइमन्त्री पम्फा भुसालले अन्तर्राष्ट्रिय बजारमा पेट्रोलियम पदार्थको मूल्य बढेसँगै आयात धान्न मुस्किल हुँदै गएकाले विद्युतीय उपकरण प्रयोग गर्न आह्वान गरेकी छन् ।
ललितपुरमा आयोजित एक कार्यक्रममा उनले विगतको तुलनामा विद्युत् सस्तो भएको बताइन् । उनले खाना पकाउने ग्याससहित पेट्रोलियम पदार्थको मूल्य निरन्तर बढेकाले आफ्नै देशको कच्चा पदार्थबाट उत्पादित ऊर्जा प्रयोग गर्न आग्रह गरिन् ।
ग्यासको सट्टा इन्डक्सन चुल्हो प्रयोग गर्ने नीतिअनुसार आफूले विद्युतको महसुल घटाएको उल्लेख गर्दै मन्त्री भुसालले भनिन्, ‘यहाँहरूलाई मेरो विशेष अपिल छ, विद्युतीय चुल्हो प्रयोग गरौँ, त्यो ग्यासभन्दा सस्तो छ ।’
हाल एक सिलिन्डर ग्यासको मूल्य एक हजार ५०० भन्दाबढी भएको छ । त्यसको मूल्य निरन्तर बढ्दै जाने छ । त्यसैगरी पेट्रोल र डिजेलको मूल्य पनि बढ्दै गएको छ । एक लिटर पेट्रोलको मूल्य १५० तथा एक लिटर डिजेलको मूल्य १३० भन्दा बढी पुगेकाले आगामी दिनमा तिनको मूल्य निरन्तर बढ्ने हुँदा विद्युतीय साधन प्रयोग गरेर जीवनलाई सहज बनाउनु पर्नेमा उनको जोड थियो । मन्त्री भुसालले भनिन्, ‘दिनदिनै पेट्रोलको मूल्य बढेको छ, गाडी किन्नेले पनि अब विद्युतीय नै किन्नु पर्छ ।’
ठूला सहरमा भाडामा बसेर आफ्नो पेशा तथा व्यवसाय गर्नेले पनि अब सजिलै विद्युतीय चुल्हो प्रयोग गर्न सक्ने बताउँदै उनले आवश्यक क्षमताको छुट्टै मिटर लिएर विद्युतीय उपकरण प्रयोग गर्न सकिने स्पष्ट पारिन् । मन्त्री भुसालले भनिन्, ‘घरभेटीको सहमतिमा डेरावालाले पनि छुट्टै विद्युत् मिटर राख्न सक्नेगरी मैले निर्णय गराएको छु । विद्युत् प्राधिकरणमा सम्पर्क गर्नु होला ।’