कैलाली- सरकारमा सहभागी नागरिक उन्मुक्ति पार्टीले सुदूरपश्चिमका मुख्यमन्त्री कमलबहादुर शाह नेतृत्वको सरकारलाई विश्वासको मत दिने निर्णय गरेको छ।

आज बसेको पार्टीको प्रदेशसभा संसदीय दलको बैठकले सुदूरपश्चिम प्रदेश सरकारलाई दिएको समर्थन कायमै राख्ने निर्णय गरेका हो।

प्रदेश सभा, संसदीय दलको कार्यालयमा बसेको बैठकमा प्रदेश सभा सदस्य कैलाश चौधरी र टीका थापा भने सहभागी थिएनन्। चौधरी र थापाबाहेक सरकारमा सहभागी पाँचजना सदस्यहरूको बैठकमा उपस्थिति थियो। बैठकपछि सञ्चारकर्मीलाई प्रतिक्रिया दिँदै आर्थिक मामिला मन्त्रीसमेत रहेका घनश्याम चौधरीले अहिलेको सरकारलाई नै समर्थन कायम राख्ने निर्णय भएको बताए।

बैठकमा सहभागी नभएका प्रदेशसभा सदस्यहरूलाई समेत सरकारमा सहभागी गराउने विषयमा छलफल भइरहेको बताउदै मन्त्री चौधरीले केन्द्रमा प्रधानमन्त्रीलाई विश्वासको मत दिएका बेला प्रदेशमा छुट्टै समीकरण बनाएर नयाँ सन्देश दिन खोजिएको बताए।

नागरिक उन्मुक्ति पार्टीले मुख्यमन्त्री शाहलाई समर्थन कायमै राखे कांग्रेसका १८ र उन्मुक्तिका ७ गरेर सरकारको पक्षमा २५ जना प्रदेश सभा सदस्य हुने छन्। शाह नेतृत्वको सरकार टिकिरहन राप्रपा र स्वतन्त्र प्रदेश सभा सदस्यको समर्थन आवश्यक पर्नेछ। बहुमत पुर्‍याउन सरकारको पक्षमा २७ जना सदस्यको समर्थन हुनुपर्छ।