मनिष अर्याल
अमेरिकी मिलेनियम कम्प्याक्ट (एमसीसी) संघीय संसदबाट पारित भएको विरोधमा सोमबार नेत्रबिक्रम चन्द ‘विप्लव’ नेतृत्वको नेकपासहितका दलहरूले नेपाल बन्द आह्वान गरेका थिए।
तर, काठमाडौं उपत्यकामा बन्दको असर न्यून रह्यो। बिहानीपख सार्वजनिक यातायातका साधन कम चले पनि मध्याह्नपछि उपत्यकाका सबै पसल, व्यवसाय, कार्यालयहरू र यातायातका साधन निर्वाध चले।
नयाँबानेश्वरस्थित संघीय संसद भवन अघिल्तिर प्रेसर कुकरमा तार बेरेर बन्दकर्ताले आतंक फैलाउन खोजे। तर, सेनाको टोली आएर उक्त वस्तु निश्क्रिय बनायो। कुकर विष्फोटक पदार्थ नभई इँटाका टुक्राहरू पाइएको सेनाले जनाएको छ। काठमाडौं उपत्यकाबाहिर भने बन्दको सामान्य असर देखिएको छ।
झण्डै अढाइ वर्षदेखि रोकिएको एमसीसी सम्झौता आइतबार राति प्रतिनिधिसभाबाट १२ बुँदे व्याख्यात्मक घोषणासहित पारित भएको छ। त्यसका लागि सत्ता गठबन्धनका चारवटा दल एक ठाउँमा उभिएका छन्। बाहिरैबाट सरकारलाई समर्थन दिएको राष्ट्रिय जनमोर्चा भने विपक्षमा उभिएको थियो।
