युक्रेनका राष्ट्रपति भोलोदिमिर जेलेन्स्कीले आफूलाई नियन्त्रणमा लिने रुसी प्रयास विफल बनाइएको बताएका छन्।
शनिबार एक भिडियो सन्देश जारी गर्दै जेलेन्स्कीले रुसी सेनाले आफूलाई समात्ने प्रयास असफल भएको बताएका हुन्। शुक्रबार राति रुसीले सेनाले आफूलाई पक्रिने प्रयास गरेको उनको भनाइ छ। ‘हामीले उनीहरूको प्रयास विफल बनाएका छौँ,’ उनले भने।
राजधानी किभ र आसपासका प्रमुख शहरहरूमा युक्रेनी सेनाको पूर्ण पकड रहेको उनले बताए। र, ती शहरमा प्रवेश गर्ने रुसी सेनाको प्रयास असफल रहेको उनको भनाइ छ।
भिडियो सन्देशमा जेलेन्स्कीले रुसका नागरिकहरूलाई राष्ट्रपति भ्लादिमिर पुटिनमाथि युक्रेनमा भइरहेको आक्रमण बन्द गर्न दबाब सिर्जना गर्न आह्वान पनि गरेका छन्। ‘हजारौँ पीडित र सयौँ बन्दीलाई आफूहरूलाई युक्रेन किन पठाइएको भन्ने जानकारी छैन। यहाँ उनीहरूलाई आफू मर्न र अरूलाई मार्न पठाइएको हो,’ भिडियो सन्देशमा रुसी भाषामा उनले भनेका छन्, ‘तपाईंहरू जति छिटो आफ्नो सरकारलाई युक्रेनमाथि आक्रमण बन्द गर्न बाध्य बनाउनु हुनेछ, त्यति नै तपाईंहरूका मानिस बाँच्ने छन्।’
राष्ट्रपति जेलेन्स्कीको संकेत रुसले सेनाको बर्दी पहि¥याएर सरकारबाट पीडित भएका र बन्दीहरूलाई लडाईंमा होमिरहेको भन्ने हो।
यसअघि जेलेन्स्कीले किभको सडकमा निस्केर एक भिडियो सन्देश जारी गरेका थिए। र, आफूहरूले रुसको सामु आत्मसमर्पण नगर्ने बताएका थिए। ‘म यहीँ छु, हामी हतियार बिसाउने पक्षमा छैनौँ। आफ्नो देशको रक्षा गरेरै छाड्ने छौँ,’ उनले भनेका थिए।