प्रतिनिधिसभाको शुक्रबार दिउँसो १ बजे बस्ने बैठकमा अमेरिकी मिलेनियम कम्प्याक्ट (एमसीसी) सम्झौतामाथि छलफल हुँदैछ।
संसद् सचिवालयले सार्वजनिक गरेको सम्भावित कार्यसूचीमा सरकारले एमसीसीमाथि सामान्य छलफल होस् भन्ने प्रस्ताव पेश गर्ने उल्लेख छ ।
प्रतिनिधिसभाको बिहीबारको बैठकका लागि निर्धारण गरिएको कार्यसूची नै शुक्रबारका लागि राखिएको हो। बिहीबारको बैठक विशेष कारणले बस्न नसक्ने भएकाले प्रतिनिधिसभा नियमावली, २०७५ अनुसार सूचना टाँस गरी आज दिउँसो १ बजेसम्मका लागि स्थगन गरिएको थियो।
आजको बैठकको सम्भावित कार्यसूचीको अर्को बुँदामा प्रधानमन्त्री शेरबहादुर देउवाले महान्याधिवक्ताको वार्षिक प्रतिवेदन आर्थिक वर्ष ०७७-७८ पेश गर्ने कार्यक्रम छ।
सभामुख अग्निप्रसाद सापकोटाले बैठकअघि कार्यव्यवस्था तथा परामर्श समितिको बैठक राखेका छन्। संसद् सचिवालयका अनुसार एमसीसी प्रस्ताव सैद्धान्तिक छलफलका लागि पेश भएपछि बोल्न चाहने सांसदले छलफलमा भाग लिनेछन्। सरकारले गत आइतबार एमसीसी सदनमा टेबल गरेको थियो।