काठमाडौं- धनगढी-खुटिया-बीपीनगर-दीपायल द्रुतमार्गमा कालोपत्रे शुरु भएको छ।
धनगढी-स्याउले सडकखण्डमा कालोपत्रको काम शुरु भएको सडक योजना कार्यालयले जनाएको छ।
कार्यालय प्रमुख लक्ष्मण रावलका अनुसार धनगढी-खुटिया-बीपीनगर-दीपायल द्रुतमार्गअन्तर्गत धनगढी-स्याउले सडकखण्डको १३.४ किलोमिटर खण्ड कालोपत्रे गर्न थालिएको हो। गत आर्थिक वर्षमा बजेट अभावका कारण अलपत्र परेको उक्त सडक चालु आवमा अगाडि बढेको उनले बताए।
द्रुतमार्गको २३ किमी सडक कालोपत्रे गर्न वैशाख ०७८ मा ठेक्का सम्झौता भएको थियो। धनगढी-स्याउले खण्डको १३.४ र दीपायल-बाजमोर्ड खण्डको ९.४ किमी सडक कालोपत्रेका लागि सम्झौता भएको थियो।
कैलालीमा थप साढे ६ किमी र डोटीतर्फ १५ किमी कालोपत्रका लागि ठेक्का सम्झौता भएको योजना कार्यालयले जनाएको छ। चार खण्डमा कालोपत्रको काम हुने कार्यालय प्रमुख रावलले जानकारी दिए।
डोटी क्षेत्रमा ६ किलोमिटर सडक कालोपत्रे भइसकेको छ। बाँकी क्षेत्र र कैलाली खण्डमा कालोपत्रको काम अघि बढेको उनले बताए। द्रुतमार्गको ४३.८ किमी सडक कालोपत्रेका लागि सम्झौता भएकामा झण्डै ७० प्रतिशत मात्र काम पूरा भएको आयोजनाले जानकारी दिएको छ।
धनगढी खण्डअन्तर्गत पीपलचौताराबाट स्याउलेसम्मको १३.४ किमी कालोपत्रेका लागि भ्याटबाहेक १६ करोड ४० लाख रुपैयाँमा ठेक्का भएको थियो। दीपायल खण्डमा निर्माण कम्पनी काम गरिरहेको छ।
दुई वर्षअघि ठेक्का सम्झौता गरिए पनि बजेट अभावले सडक निर्माण अलपत्र परेको थियो। चालु आवमा संघीय सरकारले २५ करोड बजेट विनियोजन गरेपछि कामले निरन्तरता पाएको आयोजना कार्यालयले जनाएको छ।
२०६४ सालमा खुटिया-दीपायल द्रुतमार्गको औपचारिक रूपमा सर्भे गरी ट्र्याक खोल्न थालिएको थियो। त्यसबेला खुटियाबाट दीपायलसम्म ८२ किमी सडक सर्भे गरिएको भए पनि पछि पूर्वपश्चिम राजमार्गको स्याउलेबाट धनगढीसम्मको १० किमी थप गरेर ९२ किमीमा काम भइरहेको आयोजनाले जनाएको छ।