एमाले सचिव तथा पूर्वमन्त्री योगेश भट्टराईले सरकारका सयदिने उपलब्धी समेटिएको पुस्तकमा चुच्चे नक्सा गायब भएकामा प्रश्न उठाएका छन्।

सामाजिक सञ्जालमार्फत आफ्नो धारणा सार्वजनिक गर्दै भट्टराईले नेपाल सरकार प्रकाशक रहेको पुस्तकमा छापिएको नक्सामा कालापानी, लिम्पियाधुरासहितको भूभाग नभएकामा प्रश्न गरेका हुन्।

‘नेपाल सरकार प्रकाशक रहेको तस्बिरमा सरकारका १०० दिन पुस्तकमा नेपालको संसदले सर्वसम्मत रूपले पास गरेको नेपालको चुच्चे नक्सा कता गयो प्रधानमन्त्रीज्यू ?’ भट्टराईले लेखेका छन्, ‘कि तपाईंलाई संसदको निर्णय मान्य छैन ? होइन भने यो हदको लापरवाही गर्नेलाई कारवाही भएको र प्रम देउवाले सार्वजनिक रूपमा माफी मागेको खबर सुन्न नेपाली जनता आतुर छन्।’