काठमाडाैं– पाकिस्तानी पुरूष क्रिकेट टिम सात वर्षपछि भारत पुगेको छ।

एक दिवसीय विश्वकप खेल्न बाबर आजमकाे नेतृत्वमा बुधबार हैदरावाद पुगेकाे पाकिस्तानी क्रिकेट टिमलाई विमानस्थलमा भव्य स्वागत गरिएकाे छ।

पाकिस्तान क्रिकेट बाेर्डले विमानस्थलभित्र र सडकसम्म उत्साहित भीडले पाकिस्तानी टिमको न्यानाे स्वागत गरेको बताएकाे छ। उसले आफ्नो टिमको विमानस्थलदेखि होटलसम्म भएको स्वागतको भिडिओ सामाजिक सञ्जाल एक्समा शेयर गरेकाे छ।

भारतमा आयाेजना गर्न लागिएकाे एक दिवसीय विश्वकप विश्वकप क्रिकेट प्रतियोगिता ५ अक्टोबरदेखि १९ नोभेम्बरसम्म हुनेछ।

पाकिस्तानले यसअघि भारतमा सन् २०१६ मा टी-२० विश्वकप खेलेको थियो।