वासिङ्टन- पाकिस्तानका लागि पूर्वअमेरिकी राजदूत रिचार्ड जी. ओल्सनलाई कतारका लागि पैरवी गर्दा संघीय कानून उल्लंघन गरेको अभियोगमा तीन वर्षको प्रोबेसन र ९३ हजार ३५० डलर जरिवाना तोकिएको छ।
उनीविरुद्ध दुबईका अमिरको आभूषण स्वीकार गर्ने तथा पछि पत्नी भएकी पूर्वप्रेमिकाका लागि ट्युसनको व्यवस्था गरेको अभियोगमा भने सजाय सुनाइएको छैन।
आफ्नो ३४ वर्षको करिअरमा उनी पाकिस्तान र संयुक्त अरब इमिरेट्स (यूएई)मा अमेरिकाका राजदूत रहे। पाकिस्तान र अफगानिस्तानमा अमेरिकी विशेष प्रतिनिधिको जिम्मेवारी सम्हालेका थिए। र, सन् २०१६ मा सेवानिवृत्त भएका थिए।
कोलम्बिया राज्यका न्यायाधीश जी. माइकल हार्बेले ओल्सनलाई संघीय पैरवी तथा नैतिकता कानून उल्लंघन गरेकामा दोषी ठहर गरेका हुन्। अमेरिकी संघीय कानूनअनुसार सेवा निवृत्त सरकारी कर्मचारीले कम्तिमा एक वर्ष विदेशी ग्राहकका लागि काम गर्न पाइँदैन। उनले भने राजनीतिक दान दाता इमाद जुबेरीका लागि कानूनविपरीत काम गरेको पाइएपछि सजाय सुनाइएको हो। उनले आफ्नो गल्ती स्वीकारेका छन्। इमाद जुबेरी चोरी, वित्तीय कानून उल्लंघन र एक विदेशी एजेन्टका रूपमा पञ्जीकृत नभई काम गरेकामा १२ वर्षको जेल सजाय काटिरहेका व्यक्ति हुन्।
अभियोजन पक्षले ओल्सनलाई कम्तिमा ६ महिना जेल सजाय दिन माग गरेका थिए। न्यायाधीशले भने उनीमाथि ९३ हजार ३५० अमेरिकी डलर जरिवाना तोकेका छन्।
ओल्सन सन् २०१५ मा पाकिस्तानमा राजदूत थिए। त्यतिबेला खाडी मुलुकमा लगानी फर्ममा नोकरीका लागि लन्डनमा अन्तर्वार्ता दिन जान १८ हजार डलरको हवाई टिकट स्वीकारेका थिए। र, सन् २०१७ मा अमेरिकी संघीय कानून उल्लंघन गर्दै कतार सरकारका तर्फबाट अमेरिकी अधिकारीहरूसँग पैरवी गर्न अवैध रूपमा मद्दत गरेका थिए।
अमेरिकी सञ्चार माध्यमहरूका अनुसार ओल्सनले आफ्नी तत्कालीन सासुले सन् २००३ मा दुबईका अमिरबाट आभुषणहरूको ६० हजार डलर उपहार पाएकी थिइन्। ओल्सनले त्यसबारे सरकारलाई कुनै सूचना दिएका थिएनन्। त्यतिबेला उनी दुबईमा अमेरिकी महावाणिज्यदूत थिए। उनकी सासु उनीसँगै बस्थिन्।
त्यति मात्रै होइन, ओल्सनले इस्लामावादमा राजदूत छँदा जुबेरीलाई २५ हजार डलर भुक्तानी दिएको पुष्टि भएको थियो। आफ्नी प्रेमिकालाई न्युयोर्क पठाउने हवाई टिकट खरिदका लागि उक्त भुक्तानी दिएका थिए। जुबेरीले ओल्सनलाई सेवा निवृत्त हुनासाथ आफ्नो सल्लाहकार नियुक्त गरेका थिए। र, त्यसवापत २० हजार डलर भुक्तानी दिएका थिए।