सुनसरी- बाल अधिकार दिवसको अवसरमा २९ भदौमा काठमाडौमा हुन गइरहेको राष्ट्रव्यापी गायन तथा नृत्य प्रतियोगितामा बराहक्षेत्र नगरपालिका–२ स्थित हिमालयन इंग्लिस बोर्डिङ स्कुलका बाल प्रतिभाहरूले सहभागिता जनाउने भएका छन्।
शिक्षिका पूर्णगंगा कार्कीका अनुसार सो प्रतियोगितामा सहभागी हुन हिमालयन टेलिभिजनबाट प्रसारण भएको गायन रियालिटी सो ‘भ्वाइस किड्स नेपाल’मा उत्कृष्ट प्रस्तुती दिएर चर्चामा कमाएका बाल गायक राजेश परियारसहित प्रधानाध्यापक आलोक श्रेष्ठसहित छात्रछात्राको ११ सदस्यीय टोली काठमाडौं आएको छ।
शिक्षक प्रदीप ठकुरीको शब्द, संगीतमा बाल गायक परियारले ‘मेरो सानो मुटुमा, मेरो देश उठाउँछु, पढी, लेखी, ज्ञान, सीपले विश्वसामु नेपाल’ बोलको गीत भोलि मंगलबार प्रस्तुति दिँदैछन्। अडिसनको फाइनल राउन्डसम्म पुग्ने उनको लक्ष्य छ। शिक्षक ठकुरीका अनुसार उनकै निगरानीमा राजेशले मिहिनेत साथ प्रशिक्षण दिइरहेका छन्।
दिया राई, मुस्कान तामाङ, आन्सु मगर, युमिन्सा राई, रोशनी राई, हिमाल राई, एन्जल पुरी र सौजन राईले किराँतीहरूको भेषभुषामा सजिएर पूर्वाञ्चलको प्रसिद्ध साकेला सिली नृत्यमा उत्कृष्ट प्रस्तुति दिँदै छन्। उनीहरूले निर्णायक मण्डल र दर्शकहरूको मन जित्नेमा टोली आशावादी रहेको प्रधानाध्यापक श्रेष्ठ बताए। ‘छात्रछात्राहरूले नृत्यमा मिहिनेत गरेका छन्, हेरौं कस्तो रिजल्ट आउँछ,’ उनले भने। भोलि मंगलबारदेखि बाल प्रतिभाहरूको गायनको अडिसन शुरु हुँदैछ।