गज्जबको तमासा चलिरहेको छ
हाम्रो नेपालमा
आकाशे पानीले पनि शान्त गर्न नसक्ने
रिसको डढेलो लागेको छ शहरमा

प्रधानमन्त्री सरकारको विरोधमा
जुलुस निकालेर
आफ्नै सरकारलाई झोस्ने कुरा गर्छन्

मेयर सिंहदबारमा
आगो झोस्ने धम्की दिन्छन्

कोही शरणार्थी मुद्दामा
कोही ललिता निवासमा
आगो झोस्दै ठिक्क

संसदमा पनि एक अर्काप्रति
आगो झोसाझोस छ

एमसीसीको मसी सुक्न नपाउँदै
चल्न दिने कि नदिने
आगो झोसाझोस छ

छिमेकीको नयाँ नक्सा आउँदा
आगो झोसाझोस छ

देशको अर्थतन्त्रमा आगो झोसेर
लुकेको अर्थ खोज्दै ठिक्क

जनताको आशामा आगो झोस्नेहरू
नेपालीजनको रिसको आगो
कता झोसिने हो थाहा छैन फेरि