भक्तपुर– भक्तपुरको सिपाडोलस्थित केदारनाथको शिर डोलेश्वर महादेव मन्दिरमा आज मन्दिरका चारै ढोका खुला गरिएकाे छ। त्यस्तै आज भक्तजनले शिला छोएर पूजा गर्न पाउने भएका छन्।
डोलेश्वरलाई केदारनाथको शिर भाग भएको घोषणा गरिएको दिन ६ भदौ भएकाले केदारनाथको शिर डोलेश्वर महादेव संरक्षण तथा विकास समितिले मन्दिरको चारै ढोक खुला राखी भक्तजनले शिला छोएर पूजा गर्न सकिने व्यवस्था गरिएको समितिका महासचिव हरिशरण बस्नेतले बताए।
समितिले डोलेश्वरमा वर्षको तीन दिन महाशिवरात्रि, अक्षय तृतीया र ६ भदौ मन्दिरको चारै ढोका खुला गरेर भक्तजनले शिला छोएर पूजा गर्न सकिने व्यवस्था गर्दै आएको छ।
यसैबीच डोलेश्वर महादेव मन्दिरमा गत १ साउनदेखि सञ्चालन भएको श्रावणी मेला आज समापन हुँदैछ। समितिले भगवान् शिवको विशेष महिनाका रूपमा रहेको साउन महिनाको १ गते स्थानीय चन्द्रविनायक मन्दिरबाट डोलेश्वर महादेवसम्म कलशयात्रा गरी श्रावणी मेला सुरु गरिन्छ।
आजकै दिन डोलेश्वरको विशेष पूजाअर्चना गरी मेलाको समापन गरिँदै आएको महासचिव बस्नेतले बताए।