काठमाडाैं– काठमाडौं उपत्यका अपराध अनुसन्धान कार्यालयले ललितपुरबाट ५०० के.जी. भन्दा बढी आतिसबाजी/पटकासहित एकजनालाई पक्राउ गरेकाे छ।
ललितपुर सानेपा बस्दै आएका बाराकाे कलैया उपमनपा-१९ घर भएका २८ वर्षीय जितेन्द्र कुमार जैसवाललाई शनिबार दिउँसाे प्रहरीले पक्राउ गरेकाे हाे।
ललितपुरमा केही व्यक्तिहरूले गैरकानूनी रूपमा भारतबाट पटका, भुईंचम्पा लगायतका आतिसवाजीजन्य विष्फोटक पदार्थहरू पैठारी गरी ल्याई भण्डारण गरी कारोबार गर्ने गरेको भन्ने गोप्य सूचनाको आधारमा अपराध अनुसन्धान खटिएको टोलीले उनलाई साे पटकासहित पक्राउ गरेकाे कार्यालयका सूचना अधिकारी प्रहरी उपरीक्षक मिलन के.सी.ले बताए।
ललितपुर महानगरपालिका-१ कुपण्डोलकाे कानदेवतास्थानस्थित जैसवालले भाडामा लिई गोदाम बनाई राखेको कोठाबाट ३१ वटा बोरामा रहेका रकेट बम, किङ काेब्रा, फायर वाेर्कस्, सिभाक्सीसमेत लेखिएको ५०० के.जी भन्दा बढी विभिन्न किसिमका आतिसबाजी/पटकाहरू प्रहरीले बरामद गरेकाे छ।
जैसवाललाई विष्फोटक पदार्थसम्बन्धी कसूरमा आवश्यक अनुसन्धान तथा कारवाहीको लागि जिल्ला प्रहरी परिसर ललितपुर पठाइएको प्रहरीले बताएकाे छ।