काठमाडौं– प्रधानमन्त्री पुष्पकमल दाहाल प्रचण्डले गिरीबन्धु टी इस्टेट्सको जग्गा प्रकरणमा पनि बिस्तारै अनुसन्धान गर्ने सुरु गर्ने बताएका छन्।

मंगलबार बालुवाटारमा सम्पादकहरूसँग कुराकानी गर्दै प्रधानमन्त्री प्रचण्डले बाटोमा भेटिएका ललिता निवास र भुटानी शरणार्थी प्रकरणलाई टुंगाेमा पुर्‍याउन सरकार लागिरहेकाेले बिस्तारै गिरीबन्धु टी इस्टेट्सको जग्गा प्रकरणमा पनि छानबिन हुने बताएका हुन्।

केपी शर्मा ओली नेतृत्वको सरकारले झापाकाे विर्तामोडस्थित गिरीबन्धु टी इस्टेटसको नाममा रहेको ३४२ विघा १९ कट्ठा, १२ घुर जग्गा सट्टा भर्ना गर्न दिने गरी भूमिसम्बन्धी ऐनको आठौं संशोधन गरेको थियो।

साे सरकारलाई गिरीबन्धु टी इस्टेट्सको बहुमुल्य जग्गा बेच्न कानुन संशोधन गरेको र ठूलाे आर्थिक चलखेलकाे आरोप लाग्दै आएको छ।