सुनसरी– बराहक्षेत्र नगरपालिका द्वारा सञ्चालित बराहक्षेत्र नगर अस्पतालमा प्रसुती सेवा उपलब्ध नहुँदा तत्काल अप्रेसन गरेर बच्चा जन्माउनुपर्ने महिलाहरुलाई समस्या भएकाे छ।

बराहक्षेत्र नगरपालिकाको केन्द्र विन्दु चक्रघट्टीमा रहेको साे अस्पतालमा दैनिक एक सय ७५ देखि दुई सय ५० को सङ्ख्यामा सेवाग्राहीहरू आउने गरेका छन्। तर हालसम्म पनि अस्पतालले प्रसुती सेवा उपलब्ध नगराउदा तत्काल अप्रेसन गर्नुपर्ने गर्भवतीलाई पनि अन्यत्र लानुपर्ने बाध्यता भएकाे हाे।

नगर अस्पतालको छेउमै रहेको महेन्द्रनगर हेल्थ पोष्टले सुत्केरी (वर्थिङ सेन्टर)को सुविधा दिइरहेको छ। साे वर्थिङ सेन्टरमा ३ जना स्वास्थ्यकर्मीले साधारण डेलिभरी गराउने सेवा दिइरहेका छन्।

घर नजिक नगर अस्पताल भएरपनि प्रसूति व्यथा लागेका महिलालाई अप्रेसन गरेर बच्चा जन्माउन बि.पि.स्वा.वि.प्रतिष्ठान धरान तथा कोशी अञ्चल विराटनगर जानुपर्ने बाध्यता रहेको स्थानिय प्रदिप कार्कीले बताए। “महिला दिदि बहिनिहरुको प्रशव पिडाको आवाज कसले सुन्ने? कसले आवाज उठाउने हो? अकालमा कसै दिदि बहिनिको मृत्यु भयो भने कसैले जिम्मेवारी लिने हो?” उनले प्रश्न गरे।

२४ सै घण्टा ३ जना स्वास्थ्यकर्मीले पालैपालो गरि नियमित रूपमा प्रसुती सेवा सुविधा दिदै आइरहेको र सुत्केरी गराउने १ वटा मात्र बेड रहेको हुदा १ भन्दा बढी सुत्केरी हुन आएमा भुईमा राखेर पनि सेवा दिईरहेको महेन्द्रनगर हेल्थ पोष्टकी सिनियर अनमी सोभा भण्डारीले बताइन्।

आर्थिक अवस्था कमजोर भएका विपन्न महिलालाई साधारण डेलिभरी गराउन नसकेमा कोशी अञ्चल अस्पताल विराटनगर रिफर गरेर पठाउने गरेको भण्डारीले बताइन्।

कमजाेर आर्थिक अवस्थाका परिवारलाई सुत्केरी गराउन लैजादा र ल्याउदा सवारी साधनदेखि औषधी उपचारसम्म आर्थिक भार थपिएकाे स्थानीय चित्र राई बताउँछन्। “नगर अस्पतालले दिनु पर्ने प्रसुती सेवा सुविधाको बारेमा कसले चासो ध्यान दिने हो? यसमा सम्पुर्ण राजनीति दल सरोकार राख्ने निकायको ध्यान जान जरुरी छ।” उनले भने।

बराहक्षेत्र नगरपालिकाभित्र चतरा अस्पताल, नगर अस्पताल गरि १४ वटा स्वास्थ्य केन्द्र छन। जसमा ४ वटा मात्र वर्थिङ सेन्टर छन्।

नगर अस्पतालमा ३ जना एम.वि.विएस. डाक्टर, २ जना एच.ए लगायत स्वास्थ्यकर्मी र कर्मचारी गरेर ४१ जना जनशक्ति कार्यरत छन्।

अस्पतालले वर्षको ३६५ दिनै बिहान ७ बजे देखि बेलुकी ७ बजे सम्म ओपिडी सेवा र आकस्मिक सेवा दिँदै आइरहेको र २४ सै घण्टा इमरजेन्सी, ल्याब,फार्मेसी, भिडियो एक्स-रे सुबिधा उपलब्ध गराइरहेको स्वास्थ्यकर्मी प्रमोद यादवले बताए।