सभामुख देवराज घिमिरेले मुलुकको कला, संस्कृतिको विकास प्रवर्द्धनमा सांस्कृतिक संस्थानको महत्त्वपूर्ण योगदान रहेको बताउनुभएको छ ।

सांस्कृतिक संस्थानको ५१ औँ वार्षिकोत्सवको आज यहाँ उद्घाटन कार्यक्रममा उहाँले राष्ट्रव्यापीरूपमा कला, संस्कार र संस्कृतिको विकासमा संस्थानको महत्त्वपूर्ण भूमिका रहेको भन्दै आगामी दिनमा यसलाई थप प्रभावकारी बनाउन जरुरी भएको उल्लेख गर्नुभयो ।

सभामुख घिमिरेले भन्नुभयो, “हाम्रा पुराना भाका, लोक साहित्य, लोकगीत, लोकनृत्य, विभिन्न जातजातिको ऐतिहासिक संस्कार र संस्कृतिको जगेर्ना र विकास गर्ने काममा संस्थानले महत्त्वपूर्ण योगदान गर्दै आएको छ । यसले अनेकताभित्रको एकतालाई विस्तार गर्ने, संस्कृति, परम्परा र मर्यादालाई उत्थान प्रवर्द्धनमा योगदान पुग्छ ।”

सभामुख घिमिरेले देशलाई कला र संस्कृतिको माध्यमबाट थप समृद्ध बनाउन र अन्तर्राष्ट्रिय प्रवर्द्धनमा संस्थानले भूमिका खेलेको उल्लेख गर्नुभयो । “लोप हुन लागेका राष्ट्रिय संस्कार र संस्कृतिको विकास गर्ने, ठूलालाई आदर गर्ने, सानालाई माया गर्ने संस्कृतिको विकास गर्ने विभिन्न धर्म र संस्कृतिका परम्परा सङ्गीतका विभिन्न विधामा अभिव्यक्त हँुदै आइरहेको छ । आगामी दिनमा यसलाई थप प्रभावकारी बनाउन जरुरी छ”, उहाँले भन्नुभयो ।

संस्थानका महाप्रबन्धक अशोककुमार राईले मौलिक एवं लोक संस्कृतिको विकास एवं प्रवर्द्धनमा संस्थानले महत्त्वपूर्ण उपलब्धि हासिल गरेको उल्लेख गर्नुभयो ।

संस्थानले यसै वर्षदेखि नमूनाका रूपमा सुरु गरिएको ‘एक प्रदेश एक स्थानीय तह’ कार्यक्रमअन्तर्गत सुदूरपश्चिमको कञ्चनपुर जिल्लाको भीमदत्त नगरपालिकादेखि पूर्वको इलामस्थित सूर्योदय नगरपालिकासम्म पुगेर सांस्कृतिक जागरण अभियान सञ्चालन गरेको छ । यसले मौलिक संस्कृति, वेशभूषा, रहनसहन, जीवनशैली एवं प्रस्तुतीजन्य लोककलाको संरक्षण प्रवर्द्धन विकासमा स्थानीय निकायलाई थप जागरुक बनाएको महाप्रबन्धक राईले बताउनुभयो ।

कूटनीतिक नियोगसँग लोकसांस्कृतिक आदनप्रदान गर्ने अभियानस्वरूप भारतीय राजदूतावास काठमाडौँ र संस्थानको संयुक्त आयोजनामा मासिक धाराबाहिक कार्यक्रम सञ्चालन भइरहेको छ । अन्य छिमेकी र मित्रराष्ट्रसँग पनि समन्वय यस्ता कार्यक्रम विस्तार गरी विश्वव्यापीरूपमा लैजाने योजना रहेको संस्थानले जनाएको छ ।

सो अवसरमा ‘सांस्कृतिक संस्थान दीर्घ साधना सम्मान–२०८०’ बाट वरिष्ठ सङ्गीतकार गणेश रसिक, ‘सांस्कृतिक संस्थान राष्ट्रिय सङ्गीत पुरस्कार’ गायक शम्भु राई र ‘सांस्कृतिक संस्थान राष्ट्रिय नृत्य पुरस्कार’ विमला श्रेष्ठ क्षेत्रीलाई नगद रु ५१ हजारसहित कदरपत्रद्वारा पुरस्कृत गरिएको थियो ।

त्यसैगरी सांस्कृतिक संस्थान नाटक पुरस्कारबाट सुष्मा शाही तथा कदरपत्रबाट अशोक राई र लीलाधर बास्कोटालाई सम्मान गरिएको थियो । सांस्कृतिक संस्थान उत्कृष्ट कर्मचारी पुरस्कारबाट केशवराज राईलाई सम्मान गरिएको थियो । कार्यक्रममा विभिन्न कला, संस्कृति, पहिचान झल्कने विभिन्न साङ्गीतिक प्रस्तुति गरिएको थियो ।