काठमाडौं- ताप्लेजुङको काबेली खोला आसपासको क्षेत्रमा अहिले भारी वर्षा भइरहेको छ।

अहिले बिहान साढे ३ बजे ‘अलर्ट’ जारी गर्दै जल तथा मौसम विज्ञान विभागको बाढी पूर्वानुमान महाशाखाले त्यसबारे जानकारी दिएको हो।

महाशाखाका अनुसार ताप्लेजुङका काबेली र तावा खोलाका जलाधार क्षेत्रमा भारी वर्षा रेकर्ड भएको छ। पछिल्लो ३ घण्टामा त्यस क्षेत्रमा अत्यधिक वर्षा भएको छ।

काबेली र तावा खोला आसपासका बस्तीका बासिन्दालाई उच्च सतर्कता अपनाउन महाशाखाले आग्रह गरेको छ। दुवै खोला सप्तकोशीको सहायक तमोर नदीमा आएर मिसिन्छन्। तसर्थ, तमोरमा पनि जल सतह बढ्ने आकलन छ। काबेली खोला ताप्लेजुङ र पाँचथरको सीमा भएर बग्छ।