काठमाडौं– नागरिकता माग गर्दै माइतीघर मण्डलमा धर्नामा बसेका एक युवकले आत्मदाहको प्रयास गरेका छन्।

मण्डलमा धर्नामा बसेका मोरङ कटहरीका २५ वर्षीय निरजकुमार कामतले आफ्नै शरीरमा पेट्रोल खनाएर आत्मदाहको प्रयास गरेका हुन्।

नजिकै प्रहरी भएकाले तत्काल रोक्न सकिएकाे र स्वास्थ्य परीक्षणको लागि ट्रमा सेन्टर लगिएको जिल्ला प्रहरी परिसरका प्रवक्ता एसपी सीताराम रिजालले जानकारी दिए।

निरजका हजुरबुबा र बुबाले जन्मको आधारमा नेपाली नागरिकता लिएका थिए १८ वर्ष पुगेदेखि नागरिकता लिने प्रयासमा रहेका निरज पछिल्लो पाँच वर्षदेखि नागरिकताका लागि प्रयासरत छन्।।

राष्ट्रपति रामचन्द्र पौडेलले प्रमाणीकरण गरेको नागरिकता विधेयककाे कार्यान्वयनमा सर्वोच्च अदालतले रोक लगाएपछि नागरिकताविहीन संघर्ष समितिले माइतीघरमा निरन्तर प्रदर्शन गर्दै आएको छ।