मकवानपुर– वाग्मती प्रदेश सरकारले आगामी आर्थिक वर्ष २०८०/०८१ को नीति तथा कार्यक्रम सार्वजनिक गर्न प्रदेश प्रमुखलाई उपलब्ध गराएको फाइल नै खाली भेटिएपछि प्रदेशसभामा केही बेर सबै अलमलमा परेका छन्।
मुख्यमन्त्री शालिकराम जम्कट्टेलले प्रदेश प्रमुख यादवचन्द्र शर्मालाई वाचन गर्न उपलब्ध गराएको फाइलमा नीति तथा कार्यक्रम नै नभेटिएपछि प्रदेश प्रमुख यादवचन्द्र शर्मा केहीबेर ट्वा परेका थिए।
सांसदलाई वितरण गर्नका लागि प्रदेशसभामा ल्याइएको नीति तथा कार्यक्रम मुख्यमन्त्रीले प्रदेश प्रमुखलाई उपलब्ध गराएकाे फाइल खाली देखिएपछि मुख्यमन्त्री नीति तथा कार्यक्रम खोज्न हिँडेका थिए।
आइतबार दिउँसो २ बजे बसेको प्रदेशसभा बैठकमा प्रदेश प्रमुख शर्माले सरकारको नीति तथा कार्यक्रम सार्वजनिक गर्ने सूची रहेको थियो । मुख्यमन्त्री जम्कट्टेलले सामान्य प्राविधिक त्रुटि भएकाे र व्यवस्थापकीय कमजोरी भएकाे भन्दै अवस्था सामान्य बनाउन खोजेका थिए।
तर प्रतिपक्षी दलका सांसदहरुले सरकारले बिनातयारी नीति तथा कार्यक्रम ल्याउँदा यस्ताे अवस्था आएको भन्दै आपत्ति जनाएका थिए।