काठमाडौं- निर्माण सम्पन्न भएको पाँच वर्षपछि चलचित्र ‘नीरफूल’ प्रदर्शन हुने भएको छ।

यो चलचित्रमा भूकम्प, त्यसपछि निम्तिने परिस्थिति, नागरिकले भोग्ने सास्तीलगायतका विषय समेटिएको छ। भूकम्पका कारण बिछोडिएका एक परिवारको सदस्यले पुनर्मिलनका लागि गरेको प्रयत्नमा आधारित रहेको चलचित्रमा दयाहाङ राई, रेखा थापा, शान्ति वाइबा, बुद्धि तामाङ, पुष्कर गुरुङ, जिम्मे छ्योइकी घिसिङ, राजन खतिवडा, सरोज अर्याल, सरिता गिरीलगायतको अभिनय गर्नुभएको छ।

‘मलाई सधैं बाँचिरहने चलचित्रमा अभिनय गर्न मन थियो किनकि ती चलचित्र जहिल्यै देखाउन सकिन्छ। यस्तै चलचित्र बनेको छ,’ अभिनेता राईले भने, ‘यसले हाम्रै समाजको कथालाई हाम्रै सुन्दर दृश्यमार्फत व्यक्त गरेको छ। हामीले नेपालको सौन्दर्य देखाउने प्रयास गरेका छौं।’

भत्किएका मन र सम्बन्धको पुनर्निमाणको कथा समेटिएको चलचित्र विविध कारणले प्रदर्शन हुन समय लागेको हो। रुवि भ्याली र काठमाडौंमा छायांकन गरिएको चलचित्र आफूले खोजेझैं भएको अभिनेता खतिवडाले बताए। ‘कहिले पैसा र कहिले कथाले मजस्ता कलाकारलाई चलचित्रमा आबद्ध हुन बाध्य बनाउँछ। तर, यसमा दुवै पाएँ,’ उनले भने।

सचिन घिमिरे एसोसिएट निर्देशक रहेको चलचित्रमा प्रमोद कार्कीले छायांकन, निमेष श्रेष्ठलले सम्पादन, अर्जुन पोखरेल र चन्द्रकुमार दोङले संगीत दिएका छन्। यो चलचित्र २६ जेठदेखि प्रदर्शन हुँदैछ।