काठमाडौं- डिजिटल वालेट ‘खल्ती’का दुईजना कर्मचारीविरुद्ध मुद्दा नचलाउने निर्णय भएको छ।

सेवाग्राहीको खाताबाट रकम चोरेको आरोपमा केन्द्रीय अनुसन्धान ब्युरोले ‘खल्ती’का कर्मचारीलाई पक्राउ गरेको थियो। पक्राउ पर्नेमा रामेछापका अनिल कार्की र कैलालीका सन्देश स्वाँर छन्। उनीहरू विरुद्धको ठगी मुद्दामा सरकारी वकिल कार्यालय काठमाडौंले ‘मुद्दा नचल्ने’ निर्णय गरेको हो।

पक्राउ परेकाहरूले सेवाग्राहीको खाताबाट ७० लाख रुपैयाँ चोरी गरेको प्रहरीको अनुसन्धानबाट खुलेको छ। उनीहरूले सेवाग्राहीको पैसा फिर्ता गरेपछि आरोपीहरूविरुद्ध सरकारी वकिल कार्यालयले मुद्दा नचल्ने निर्णय गरेको केन्द्रीय अनुसन्धान ब्युरोका प्रवक्ता एसपी सञ्जयसिंह थापाले बताए।

उनले भने, ‘मुलुकी फौजदारी कार्यविधिसंहिता-०७४ को दफा (१७) अनुसार मिलापत्र भएको छ।’ गत चैत पहिलो साता ब्युरोले कार्की र स्वाँरलाई पक्राउ गरेर अनुसन्धान गरेको थियो।