काठमाडौं- रमदान अर्थात् रमजान महिना सकिएको खुशीमा मुस्लिम समुदायले एकअर्कामा शुभकामना साटासाट गरी आज इद उल फित्र मनाउँदैछन्।

हिजरी संवतको रमदान महिनाभर रोजा (व्रत) बसेका इस्लाम धर्मावलम्बी सौब्वाल महिनाको पहिलो तारिखमा इद मनाउँछन्। चन्द्रमाको गतिका आधारमा तय गरिने इद पर्व रमदान सकिएपछि शुरु हुने शुक्लपक्षमा पहिलोपटक चन्द्रमा देखिएको भोलिपल्ट मनाउने चलन छ।

ईदको अवसरमा कार्यवाहक राष्ट्रपति रामसहाय प्रसाद यादव, प्रधानमन्त्री पुष्पकमल दाहाल प्रचण्ड लगायतले शुभकामना दिएका छन्।

इदमा अल्लाहका नाममा विशेष नमाज प्रार्थना गर्ने परम्परा छ। इदका दिन इस्लाम समुदायको मुख्य धार्मिक ग्रन्थ कुरान मोल्वी (धर्मगुरु)ले वाचन गरेर सदविचार र सत्कर्ममा रहन प्रेरित गर्छन्।