नयाँदिल्ली- आईपीएलको २०औं खेलमा रोयल च्यालेन्जर्स बैंग्लोरले दिल्ली क्यापिटल्सलाई २३ रनले पराजित गरेर आफ्नो दोस्रो जित हासिल गरेको छ। आईपीएलको जारी सिरिजमा दिल्ली क्यापिटल्सको यो पाँचौं हार हो।
शुरुमा ब्याटिङमा उत्रिएको रोयल च्यालेन्जर्सले विराट कोहलीको अर्धशतकीय पारीका साथ ६ विकेटको क्षतिमा १७४ रन बनाएको थियो। त्यसमा कप्तान फाफ डुप्लेसीले २२, महिपाल लोमरोरले २६, ग्लेन म्याक्सवेलले २४ र शहबाज अहमदले २० रनको योगदान दिए।
त्यसको जवाफमा दिल्ली क्यापिटल्सले टिमको साह्रै खराब शुरुवात लियो। उसका आधा टिम त जम्मा ५३ रन जोडेर प्याभिलियन फर्कियो। कप्तान वार्नरले १९ रन बनाए। पृथ्वी स र मिसेल मार्सले खाता नै खोल्न सकेनन्। यश धुलले जम्मा १ रन बनाए।
मनिष पाण्डेले अर्धशतकीय पारी खेले। तर, दिल्लीको टिम २० ओभरमा ९ विकेट गुमाउँदै १५१ रनमा समेटियो। बाँकी २४ रन जोड्न नसकी दिल्लीको टिम बैंग्लोरसँग पराजित भयो।
आईपीएलको जारी सिजनमा दिल्ली पाँचौं हार बेहोर्दै अंक तालिकाको अन्तिममा अर्थात् १० औं स्थानमा निरन्तर छ। आजको जितसँगै बैंग्लोरको अंक तालिकामा एक स्थान माथि उक्लिएको छ र सातौं स्थानमा चढेको छ।